सुनसरी । सुनसरीको इनरुवा स्थित पूर्व–पश्चिम लोकमार्गमा सवारी चेकजाँचको क्रममा करिब २ करोड नक्कली नेपाली नोटसहित एक भारतीय नागरिक पक्राउ परेका छन् । 

ट्राफिक प्रहरीले पूर्व–पश्चिम लोकमार्गमा सवारी चेकजाँचको क्रममा सुनसरी खोला पुलनजिक बीआर ११ एक्स ३४२९ नम्बरको महेन्द्र स्कोरपियोबाट १ करोड ८२ लाख ५१ हजार नक्कली नेपाली नोट नक्कली नेपाली नोटसहित भारतको विहारका छोटु भन्ने महम्मद शैयाद साफीलाई पक्राउ गरिएको हो । 

ट्राफिक प्रहरीले पश्चिमबाट पूर्वतर्फ आउँदैगरेको भारतीय नागरिक साफीले चलाएको भारतीय स्कोरपियोमा कालो ब्यागभित्र सेतो बोरामा राखिएको १००० दरका १८ हजार २५१ थान नक्कली नेपाली नोट बरामद गरेको जनाएको छ । 

सोमबार जिल्ला प्रहरी कार्यालय सुनसरीमा पत्रकार सम्मेलन गर्दै बरामद भएको नक्कली नेपाली नोट, भारतीय गाडी र भारतीय नागरिक साफीलाई प्रहरीले सार्वजनिक गरेको छ । 

पत्रकार सम्मेलनमा प्रहरी उपरीक्षक विपिन रेग्मीले ट्राफिक प्रहरीले नियमित चेकजाँच गर्नेक्रममा शङ्का लागेर पछाडिको डीक्कीमा राखिएको अवस्थामा बरामद गरेको जानकारी दिनुभयो । पक्राउ परेका साफीमाथि मुलुकी अपराध संहिता २०७४ को परिच्छेद २२ अन्तर्गत मुद्रासम्बन्धी कसुरमा सुनसरी जिल्ला अदालतबाट म्याद थप भई अनुसन्धान भइरहेको जानकारी दिनुभयो । 

प्रहरी प्रवक्ता प्रहरी नायव उपरीक्षक नबीनकृष्ण भण्डारीले मुलुकी अपराध संहिता २०७४ को परिच्छेद २२ अन्तर्गत मुद्रासम्बन्धी कसुरमा १० वर्षसम्म कैद र ५० हजार रुपियाँदेखि एक लाख रुपियाँसम्म जरिवाना हुने व्यवस्था रहेको जानकारी दिनुभयो ।