काठमाडौँ ।  राष्ट्रिय प्रजातन्त्र दिवस भव्य रुपमा मनाइने भएको छ । सरकारले राष्ट्रिय प्रजातन्त्र दिवस २०८० लाई भव्यतापूर्वक मनाउने निर्णय गरेको छ । 

प्रधानमन्त्री पुष्पकमल दाहालको अध्यक्षतामा शुक्रबार  सिंहदबारमा बसेको प्रजातन्त्र दिवस मूल समारोह समितिको बैठकले  फागुन ६, ७ र ८ गते  विविध कार्यक्रम आयोजना गरेर दिवस मनाउने निर्णय गरेको हो ।

बि सं २००७ सालमा जहानियाँ राणा शासन अन्त्य गरी प्रजातन्त्र स्थापना भएको सम्झनामा फागुन ७ गते राष्ट्रिय प्रजातन्त्र दिवस मनाउने गरिएको छ । तत्कालीन समयमा  कांग्रेसले प्रजातन्त्र स्थापनाका लागि राणा शासनविरुद्ध सशस्त्र क्रान्ति नै गरेको थियो ।  कांग्रेसको नेतृत्वमा भएको त्यो क्रान्तिलाई तत्कालीन राजा त्रिभुवनले साथ दिएपछि प्रजातन्त्र स्थापना सम्भव भएको हो । पंचायतदेदि बहुदलीय व्यवस्थासम्म प्रजातन्त्र दिवस भव्य रुपमा मनाइने गरिएको थियो । तर गणतन्त्र स्थापना पछि भने प्रजातन्त्र दिवस ओझेलमा पर्यो । 

गठबन्धन सरकारले अहिले भने तीन दिनसम्म विविध कार्यक्रम गरी प्रजातन्त्र दिवस भव्य रुपमा मनाउने निर्णय गरेको हो । प्रजातन्त्र दिवस भव्य रुपमा मनाउन  फागुन ६ गते प्रजातन्त्र दिवस केन्द्रित विशेष संवाद, परिसंवाद, रेडियो नाटक लगायत जनचेतना मूलक कार्यक्रम निर्माण, सञ्चालन तथा प्रसारण गर्ने व्यवस्था मिलाइने  मूल समारोह समितिले जनाएको छ । समितिले फागुन ६ गते नै राष्ट्रियस्तरका छापा सञ्चार गृहलाई दिवसका उपलक्ष्यमा विशेषाङ्करस्मारिका प्रकाशन एवं प्रजातन्त्रको बहुपक्षीय आयामलाई उजागर गर्ने र विभिन्न लेख–रचनाहरूको सँगालो प्रकाशन गर्नको लागि आग्रह गर्ने भएको छ । 

समितिका अनुसार प्रजातन्त्र दिवसको पूर्वसन्ध्यामा सम्पूर्ण सरकारी निकाय, प्रतिष्ठान, संघसंस्थाका कार्यालयका छत, बरण्डा र परिसरमा राष्ट्रिय झण्डा मर्यादापूर्वक राखी सजाउने र साँझ मण्डला, दरबार स्क्वायर जस्ता क्षेत्र एवं घर(घरमा दीप प्रज्ज्वलन गर्ने लगायतका कार्यक्रम तय गरिएको छ ।  समितिले सबै जिल्लामा सरकारी तथा गैरसरकारी संस्थाको सहयोगमा रक्तदान कार्यक्रम सञ्चालन गर्ने, जिल्लास्तरमा फरक क्षमता भएका विद्यार्थीले अध्ययन गर्ने विद्यालयमा उपयुक्त हुने शैक्षिक तथा खेलकुद सामग्री वितरण गर्ने कार्यक्रम सञ्चालन गर्ने निर्णय समेत गरेको छ । 

समितिका अनुसार  फागुन ७ गते नेपाली सेनाबाट सैनिक मञ्च, टुँडिखेलमा बिहान सूर्योदयसँगै विगुल बजाउने तथा तोप र बन्दुकको बढाईं हुनेछ । त्यसदिन सेनाको हेलिकोप्टरबाट ‘राष्ट्रिय प्रजातन्त्र दिवस, २०८०’ अंकित व्यानर चक्रपथ वरपर प्रदर्शन गर्ने तथा नेपाली सैनिक मञ्च, टुँडिखेलमा हेलिकोप्टरबाट पुष्पवृष्टि र झण्डा प्रदर्शन गर्ने योजना बनाइएको छ । 
फागुन ७ गते नै सैनिक मञ्च, टुँडिखेलमा राष्ट्रिय प्रजातन्त्र दिवस, २०८० को औपचारिक मूल समारोह आयोजना हुने छ । समारोहमा निर्वाचित जनप्रतिनिधि, राष्ट्रसेवक कर्मचारी, सुरक्षाकर्मी सार्वजनिक तथा सामुदायिक संघसंस्था र शैक्षिक तथा प्राज्ञिक प्रतिष्ठानका पदाधिकारी, नागरिक समाजका लव्धप्रतिष्ठित व्यक्तित्व तथा सर्वसाधारण समेतको उपस्थितिका लागि आमन्त्रण गर्ने बैठकले निर्णय गरेको छ ।

समितिले प्रजातन्त्र दिवसका अवसरमा  रेडियो नेपाल तथा नेपाल टेलिभिजनबाट प्रजातन्त्र जागरण सम्बन्धित गीत प्रसारण गर्ने र अन्य रेडियो, एफएम तथा टेलिभिजनहलाई समेत प्रसारणका लागि अनुरोध गर्ने निर्णय गरेको छ ।

समितिले काठमाडौँ उपत्यका बाहिरका जिल्ला सदरमुकाममा आयोजना हुने राष्ट्रिय प्रजातन्त्र दिवस कार्यक्रम सञ्चालनको व्यवस्थाका लागि जिल्ला समन्वय समितिका प्रमुखको संयोजकत्वमा सम्बन्धित स्थानीय पालिका प्रमुख सम्मिलित समिति गठन गर्ने र सरसफाइ, प्रभातफेरि, खेलकुद, प्रवचन तथा साहित्यिक गोष्ठी, सांस्कृतिक कार्यक्रम र विभिन्न झाँकी प्रदर्शनी जस्ता विविध कार्यक्रम गरी राष्ट्रिय प्रजातन्त्र दिवस मनाउने निर्णय गरेको छ ।