काठमाडौँ । त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख डीआईजी अर्जुन चन्दको राजीनामा ‘रितपूर्ण’ नभएको भन्दै प्रहरी प्रधान कार्यालय, नक्सालले फिर्ता गरेको छ । 

‘घरायसी’ कारण देखाउँदै उहाँले गत शनिबार राजीनामा दिनुभएको थियो ।प्रहरी प्रधान कार्यालय, मानव स्रोत विभाग पुगेको डीआईजी चन्दको राजीनामा पत्र रितपूर्वक नभएकाले फिर्ता गरिदिएको प्रहरी स्रोतले जनाएको छ ।

सोमबार प्रहरी महानिरीक्षक आईजीपी वसन्तबहादुर कुँवर, मानवस्रोत विभागका प्रमुख एआईजी टेकप्रसाद राईलगायतले डीआईजी चन्दसंग छलफल गरेर राजीनामा नदिन सुझाव दिनुभएको थियो ।
 
विमानस्थलमा अध्यागमन कर्मचारी र प्रहरीबीच कुटपिट भएको घटनामा डीएसपी, असई र जवानलाई कारबाहीको सिफारिस भएपछि डीआईजी चन्द रुष्ट बन्नुभएको थियो ।  

२९ वर्ष प्रहरी सेवामा बिताएर अवकास हुन केही महिना बाँकी रहँदा राजीनामा दिँदा राम्रो सन्देश नजाने भन्दै आईजीपी कुँवरले उहाँलाई निर्णय फिर्ता लिन आग्रह गर्नुभएको थियो । डीआईजी चन्द कुँवरकै ब्याचमेट हुनुहुन्छ ।