काठमाडौँ । पूर्व सांसद तथा सिभिल सहकारीका सञ्चालक इच्छाराज तामाङलाई सम्पत्ति शुद्धीकरण मुद्दामा ३ वर्ष कैद र एक अर्ब ७२ करोड रुपैयाँ बिगो भराउने आदेश भएको छ । 

पूर्वसांसद  तामाङलाई  विशेष अदालतले  सिभिल सहकारी प्रकरणमा कैद तोक्दै र उल्लेखित रकम बिगो भराउने आदेश दिएको हो । विशेष अदालत अध्यक्ष टेकनारायण कुँवर, सदस्यहरु तेजनारायण सिंह राई र मुरारीबाबु श्रेष्ठको इजलासले  तामाङलाई आइतबार कैद र बिगो सजाय तोकेको हो । 

तामाङलाई त्यति नै रकम जरिवाना समेत तोकिएको अदालतका प्रवक्ता धनबहादुर कार्कीले जानकारी दिनुभएको छ । विशेष अदालतले इच्छाराजकी पत्नी सिर्जनालाई एक वर्ष ६ महिना कैद र एक अर्ब ३ करोड रुपैयाँ बिगो र त्यति नै जरिवाना तोकेको छ । अदालतले इच्छाराजका मामाससुरा केशवराज श्रेष्ठलाई डेढ वर्ष कैद, २५ करोड ६५ लाख बिगो र त्यति नै रुपैयाँ बराबरको जरिवाना तोकेको छ ।

यही प्रकरण्मा इच्छाराजका छोरीहरु प्रतीक्षा र प्रतिष्ठाले भने  सफाइ पाइसकेका छन् । विशेष अदालतले इच्छाराज, पत्नी, दुई छोरीहरु, इच्छाराजका मामाससुरा केशवलाल श्रेष्ठ, केशवकी पत्नी मीनाको नाममा रहेको सम्पत्ति जफत गर्न आदेश समेत दिएको छ ।