काठमाडौँ । नेपाल स्टक एक्सचेञ्ज (नेप्से) परिसूचक यो साता निरन्तर ओरालो लागेको छ ।  कारोबारको पाँचौँ दिन बिहीबार पनि नेप्से परिसूचक ३ दशमलव ९४ अङ्कले घटेर २ हजार ८४ दशमलव ०९ को बिन्दुमा कायम भएको छ । 

बिहीबार ३ सय ४ कम्पनीको १ करोड १६ लाख ८९ हजार ९ सय ५५ कित्ता शेयर,  ९१ हजार ३ सय ६४ पटकको खरिद बिक्री हुँदा ३ अर्ब ७६ करोड ४५ लाख ५ हजार ४ सय ५० बराबरको कारोबार भएको छ । कारोबारमा ९१ कम्पनीको सेयर मूल्यमा वृद्धि हुँदा एक सय ४१ कम्पनीको सेयर मूल्य घटेको छ ।

सामलिङ पावर कम्पनी लिमिटेडको शेयर मूल्य सबैभन्दा धेरै ९ दशमलव ९९ प्रतिशतले बढेको छ । सबैभन्दा धेरै घट्नेमा भने सिटिजन्स म्युचुअल फण्ड–२ को सेयर मूल्य ५ दशमलव ०३ प्रतिशतले घटेको छ ।

बिहीबार सबैभन्दा धेरै हिमालयन रिइन्स्योरेन्स कम्पनीको कारोबार भएको छ ।  यो कम्पनीको  २८ करोड ६७ लाख रुपैयाँ बराबरको कारोबार भएको हो । कारोबार भएका शेयर सङ्ख्याका आधारमा भने ङ्यादी ग्रुप पावर लिमिटेडको ५ लाख ९९ हजार ७सय ६१ कित्ता शेयर किनबेच भएको छ ।