गण्डकी  ।  सहकारीको बचत रकम अपचलनको आरोपमा पक्राउ परी प्रहरी  हिरासतमा रहेका पूर्वगृहमन्त्री तथा   राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध अदालतमा अभियोगपत्र पेश भएको छ । लामिछानेविरुद्ध कास्की जिल्ला अदालतमा आज अभियोगपत्र पेश गरिएको हो । 

जिल्ला अदालतका सूचना अधिकारी सुरज अधिकारीले सभापति लामिछानेसहित सहकारी ठगीका आरोपित अन्य व्यक्तिविरुद्ध पनि अभियोगपत्र पेस भएको जानकारी दिनुभएको छ । ‘अहिले अभियोगपत्र रुजुको काम भइरहेको छ, लामिछाने लगायतविरुद्ध आजै मुद्दा दर्ता हुन्छ, अदालतले आवश्यक प्रक्रिया अगाडि बढाइसकेको छ’ उहाँले भन्नुभयो । 

पोखराको सूयदर्शन बचत तथा ऋण सहकारी संस्था लिमिटेडको बचत रकम अपचलन गरेको आरोपमा लामिछाने गत कात्तिक २ गते काठमाडौँबाट पक्राउ पर्नुभएको थियो । उहाँमाथि कास्कीसहित अन्य जिल्लासमेत सहकारी ठगीको आरोपमा अनुसन्धान भइरहेको छ ।