काठमाडौँ । हिजो सामान्य सुधार आएको नेपाल स्टक एक्सचेञ्ज (नेप्से) परिसूचक आज फेरि घटेको छ । 

परिसूचक बुधबार ५ दशमलव ६० अंकले घटेर २ हजार ६ सय २८ दशमलव २६ को बिन्दुमा कायम भएको छ । आज ३ सय १४ कम्पनीको ८१ लाख ४७ हजार ३ सय २० कित्ता शेयर, ४९ हजार चार सय २१ पटक खरिदबिक्री भएको छ । पछिल्ला दिनमा नेप्सेमा कारोबार रकम निरन्तर घटिरहेको छ । आज पनि कारोबार रकम ४ अर्ब २७ करोड ८२ हजार रुपैयाँमा खुम्चिएको छ ।

वित्त समूह एक दशमलव शून्य सात, लघुवित्त समूह शून्य दशमलव शून्य नौ र व्यापार समूह शून्य दशमलव ५० प्रतिशतले बढेको छ भने अरु सबै समूहको उपसूचक घटेको छ । बैंकिङ शून्य दशमलव ३६, विकास बैंक शून्य दशमलव १६, होटल तथा पर्यटन शून्य दशमलव ४२, जलविद्युत् शून्य दशमलव ३६, लगानी शून्य दशमलव ३२ र जीवन बिमा समूह शून्य दशमलव ३३ प्रतिशतले घटेको छ । 

उत्पादन तथा प्रशोधन शून्य दशमलव ३२, म्युचुअल फण्ड शून्य दशमलव २६, निर्जीवन बीमा शून्य दशमलव १४ र अन्य समूह शून्य दशमलव ३७ अंकले घटेको छ ।

उपकार लघुवित्त वित्तीय संस्था लिमिटेड र सपोर्ट माइक्रोफाइनान्स वित्तीय संस्था लिमिटेडको शेयर मूल्यमा आज सकारात्मक सर्किट लागेको छ । सबैभन्दा बढी कुथेली बुखारी स्मल हाइड्रोपावर लिमिटेडको शेयर मूल्य ९ दशमलव ९० प्रतिशतले घटेको छ ।

कारोबार रकम र कारोबार भएका शेयर सङ्ख्याका आधारमा आज सबैभन्दा बढी जानकी फाइनान्स कम्पनी लिमिटेडको  १५ करोड ५९ लाख २३ हजार २ सय ८६ रुपैयाँ बराबरको एक लाख ७१ हजार चार सय ८६ कित्ता शेयर किनबेच भएको छ ।