पर्सा ।  वीरगञ्जको सिर्सियास्थित सुक्खाबन्दरगाह भन्सार कार्यालयले चालु आर्थिक वर्षको ५ महिनामा १९ अर्ब ७८ करोड ११ लाख २७ हजार रुपैयाँ राजस्व सङ्कलन गरेको छ । 

कार्यालयले पाँच महिनाको अवधिमा कूल वार्षिक लक्ष्यको ३२ दशमलव ९४ प्रतिशत राजस्व सङ्कलन गरेको हो । सुक्खाबन्दरगाह भन्सार कार्यालयका प्रमुख धनबहादुर बरुवालले चालु आवको पाँच महिनामा राजस्व सङ्कलनमा कमी आएको जानकारी दिनुभयो । कार्यालयका अनुसार विदेशी वस्तु तथा सामानको आयात घटेसँगै राजस्व सङ्कलन पनि प्रभावित भएको छ ।
 
चालु आवको साउनमा ३ अर्ब ७५ करोड, भदौमा  चार अर्ब ६४ करोड, असोजमा  चार अर्ब ३६ करोड र कात्तिकमा  तीन अर्ब ७९ करोड रुपैयाँराजस्व सङ्कलन भएको कार्यालय जनाएको छ ।

मङ्सिरमा भने अन्य महिनाको तुलनामा सबैभन्दा कम अर्थात् ३ अर्ब २२ करोड ८४ लाख २९ हजार रुपैयाँ राजस्व सङ्कलन भएको छ । कार्यालयले गत आवको पाँच महिनामा  २१ अर्ब चार करोड १६ लाख ७३ हजार रुपैया राजस्व सङ्कलन गरेको थियो ।