काठमाडौँ । प्रधानमन्त्री पुष्पकमल दाहाल र श्रीलंकाली राष्ट्रपति रनिल विक्रमासिङ्घेबीच भेटावार्ता भएको छ । असंलग्न आन्दोलन (नाम) का सदस्य राष्ट्रको १९औँ सम्मेलनमा भाग लिन युगाण्डाको कम्पालामा रहनुभएका उहाँहरुबीच शनिबार द्विपक्षीय भेटवार्ता भएको हो ।

प्रधानमन्त्री दाहालले भेटवार्तामा असंलग्न परराष्ट्र नीतिका मामिलामा नेपाल र श्रीलङ्का एक ठाउँमा उभिएकाले क्षेत्रीय सहकार्य र आपसी हितमा दुवै देशको सहकार्य आवश्यक रहेकामा जोड दिनुभएको छ । दक्षिण एशियाली क्षेत्रीय सहयोग सङ्गठन (सार्क) लाई सक्रिय र गतिशील तुल्याउन आवश्यक रहेकामा जोड दिँदै प्रधानमन्त्रीले त्यसका निम्ति साझा भूमिका खेल्नुपर्ने बताउनुभयो । प्रधानमन्त्रीले सार्कलाई गतिशील तुल्याएर क्षेत्रीय सहकार्य र साझा हितका विषयहरू सम्बोधन गर्नुपर्नेमा जोड दिनुभयो ।

भेटवार्तामा  श्रीलंकाली राष्ट्रपति विक्रमासिङ्घेले सार्कलाई सक्रिय तुल्याउन आफूहरूको सहयोग रहने बताउँदै क्षेत्रीय हित र साझा आर्थिक क्रियाकलापमा नेपाल र श्रीलङ्काबीच सहकार्य आवश्यक रहेकामा जोड दिनुभएको प्रधानमन्त्रीको सचिवालयले जनाएको छ । भेटवार्तामा प्रधानमन्त्रीसँगै परराष्ट्रमन्त्री एनपी साउद, प्रधानमन्त्रीका परराष्ट्र मामिला सल्लाहकार डा रूपक सापकोटा, परराष्ट्र सचिव सेवा लम्सालसहित परराष्ट्र मन्त्रालयका अधिकारी सहभागी हुनुहुन्थ्यो।