बागमती । नेपाल विद्युत् प्राधिकरणबाट ७ करोड रुपैयाँ बराबरका सामान हराएका छन्  । 

विद्युत् प्राधिकरणको हेटौँडास्थित केन्द्रीय जिन्सी व्यवस्थापन शाखाबाट उल्लेखित रकम बराबरका सामान हराएका हुन् । ७ करोड  रुपैयाँबराबरका सामान गायब भएपछि वास्तविकता पत्ता लगाउन गठन भएको छानविन समितिले संलग्न व्यक्तिलाई कारबाहीको सिफारिस गरेको  छ । 

विद्युत् प्राधिकरणको खरिद व्यवस्थापन महाशाखाबाट हेटौँडास्थित केन्द्रीय जिन्सी व्यवस्थापन शाखामा दाखिला भएका विद्युतीय सामान कर्मचारीको लापरबाहीका कारण गायब भएपछि प्राधिकरणले केन्द्रीयस्तरमा गठन भएको छानबिन समितिले सात करोड बराबरका सामान हराएका प्रतिवेदन दिएको प्राधिकरणको खरिद व्यवस्थापन महाशाखा प्रमुख जीतेन्द्रकुमार झाले जानकारी दिनुभएको छ । 

हेटौँडास्थित जिन्सी शाखाको तत्कालीन प्रमुख बुद्धकुमार कार्कीले वर्तमान प्रमुख रमेश पराजुलीलाई सामान बरबुझारथ गर्ने क्रममा अभिलेख अनुसारका सामान नपाइएपछि हराएको वास्तविकता सार्वजनिक भएको हो । 

‘खरिद भएका सामानको अभिलेख छ, तर स्टोरमा अभिलेखबमोजिमका सामान छैनन्’ महाशाखा प्रमुख झाले भन्नुभयो– ‘अभिलेखमा भएका सामान कहाँकहाँ छन् ? भनेर खोज्दै जाँदा कतिपय सामान अन्य प्रदेशमा गएको पनि देखियो, तर ७ करोड रुपैयाँ बराबरका सामान अझै गायब छन् ।’ 

तत्कालीन शाखा प्रमुख लगायत कर्मचारीउपर कारबाही अघि बढाइएको महाशाखा प्रमुख झाले बताउनुभयो ।