काठमाडौँ ।  प्रधानमन्त्री केपी शर्मा ओलीसमक्ष राष्ट्रिय सूचना आयोगको  वार्षिक प्रतिवेदन पेश गरिएको छ । 

आयोगको आर्थिक वर्ष २०८० र ८१ को १६ औँ वार्षिक प्रतिवेदन आज  बालुवाटारस्थित निवासमा प्रधानमन्त्रीसमक्ष  पेश गरिएको हो । 

आयोगका प्रमुख सूचना आयुक्त महेन्द्रमान गुरुङले  प्रतिवेदन प्रधानमन्त्री ओलीसमक्ष पेश गर्नुभएको हो । प्रतिवेदन प्रधानमन्त्रीमार्फत् सङ्घीय संसद्मा प्रस्तुत गरिने व्यवस्था रहेको छ । त्यस अवसरमा आयोगको वर्तमान नेतृत्वको पाँच वर्षे कार्यकालमा निर्णय भएका ‘महत्वपूर्ण आदेश सङ्ग्रह’ को प्रधानमन्त्री ओलीबाट सार्वजनिक गरिएको छ ।

प्रधानमन्त्रीले सूचनाको हकलाई वास्तविक हकका रुपमा स्थापित गर्दै सरोकार भएका पक्षलाई आवश्यक सूचना दिने काममा सरकार र आयोगबीच सहकार्य हुनुपर्ने बताउनुभयो । उहाँले लोकतन्त्रका पक्षमा सक्दो कार्यान्वयन गर्दै अराजकतालाई भने निरुत्साहन गर्नुपर्नेमा जोड दिनुभयो ।

प्रमुख आयुक्त गुरुङले आफूहरुको पाँच वर्षको कार्यकालमा पाँच हजार एक सय ८२ पुनरावेदन प्राप्त भएकामा ९५ प्रतिशत फस्र्यौट गरिएको जानकारी गराउनुभयो । 

प्रमुख आयुक्त गुरुङ आयुक्तहरु कमला ओली थापा र रत्नप्रसाद मैनालीको कार्यकाल मङ्सिर २३ गते सकिँदैछ ।