काठमाडौँ । अमेरिकी राष्ट्रपति जो बाइडेनले लेबनानी र इजरायलका प्रधानमन्त्रीसँग कुरा गरेको जनाउदै उनीहरुले द्वन्द्व अन्त्य गर्ने अमेरिकी प्रस्तावलाई स्वीकार गरेको घोषणा गर्नु भएको छ ।  

उहाँले सामाजिक सञ्जाल एक्स मार्फत यस्तो जानकारी  मूलक  समाचार सम्प्रेषण गर्नु भएको हो ।  बाइडेनले एक्समा उल्लेख गर्नु भएको छ– ‘आज, मसँग मध्य पूर्वका लागि राम्रो समाचार छ, मैले लेबनान र इजरायलका प्रधानमन्त्रीसँग कुरा गरी यस्तो घोषणा गर्न पाउँदा खुशी छु उनीहरूले द्वन्द्व अन्त्य गर्ने अमेरिकी प्रस्तावलाई स्वीकार गरेका छन् ।’

अमेरिकी राष्ट्रपतिलाई समर्थन गर्दै इजरायलले जारी गरेको विज्ञप्तिमा– ‘प्रधानमन्त्री बेन्जामिन नेतान्याहूले राष्ट्रपति जो बाइडेनसँग कुरा गरी लेबनानमा युद्धविराम सम्झौता हासिल गर्नका लागि  इजरायललाई दिएको स्वतन्त्रताको लागि धन्यवाद दिएको छ ।’

अमेरिकी राष्ट्रपति जो बाइडेन र फ्रान्सका राष्ट्रपति इमानुएल म्याक्रोनले जारी गरेको संयुक्त विज्ञप्तिमा, लामो समयको अथक कूटनीति पछि, इजरायल र लेबनानले आफूहरु विचको शत्रुता समाप्त भएको स्वीकार गर्नुभएको छ। 

घोषणाले लेबनानमा लडाइँ बन्द गर्ने तथा हिजबुल्लाह र अन्य आतङ्कवादी सङ्गठनको खतराबाट इजरायललाई सुरक्षित गर्नेछ । यो घोषणाले स्थायी शान्ति पुनर्स्थापना गर्ने अवस्था सिर्जना गरी दुवै देशका बासिन्दालाई सुरक्षित रूपमा आफ्नो घर फर्कन अनुमति दिने जनाएको छ ।   

अमेरिका र फ्रान्सले इजरायल र लेबनानसँग मिलि गरेको यो व्यवस्था पूर्ण रूपमा कार्यान्वयन गरी द्वन्द्वलाई थप हिंसात्मक बन्नबाट रोक्न कटिबद्ध रहेको बताएका छन् ।  अमेरिका र फ्रान्सले लेबनानी सेनाको क्षमता वृद्धि गरी यस क्षेत्रको स्थिरता र समृद्धिलाई अगाडि बढाउन लेबनानमा आर्थिक विकासका लागि अन्तर्राष्ट्रिय प्रयासको नेतृत्व र समर्थन गर्ने समेत प्रतिबद्धता व्यक्त गर्नुभएको छ ।

फ्रान्सका राष्ट्रपति इमानुएल म्याक्रोनले पनि  सामाजिक सञ्जाल मार्फत यो समाचार साभार गर्दै  आफू इजरायल र लेबनानबीचको युद्धविराम सम्झौतालाई स्वागत गर्न चाहेका बताउनु भएको छ ।  

आफ्नो भाषणमा राष्ट्रपति बाइडेनले  हमासले गत अक्टोबरमा गरेको आक्रमणको भोलिपल्ट देखि युद्ध शुरु भएको जनाउदै इजरायलले युद्ध शुरु नगरेको तथा लेबनान र अमेरिकाले त्यो युद्ध नचाहेको  बताउनु भएको छ । 

बाइडेनले हिजबुल्लाहसँगको युद्ध शुरु भएदेखि ७० हजार भन्दा बढी इजरायली तथा ३ लाख भन्दा बढी लेवनानी आफ्नै देशमा शरणार्थीका रूपमा बस्न बाध्य भएको जनाउनु भएको  छ ।  

इजरायल र लेबनानका जनताका लागि स्थायी सुरक्षा युद्धको मैदानमा मात्र प्राप्त गर्न नसकिने बताउदै सम्झौता सीमापारको लडाइँ समाप्त गरी शत्रुताको स्थायी अन्त्यका लागि डिजाइन गरिएको अमेरिकी राष्ट्रपति जो बाइडेनले बताउनु भएको छ ।  

घोषणा अनुसार आगामी ६० दिनमा, लेबनानी सेना एक पटक आफ्नो क्षेत्रको नियन्त्रण लिन तैनाथ हुनेछन् । दक्षिणी लेबनानमा हिजबुल्लाह आतंकवादी पूर्वाधार पुनर्निर्माण गर्न अनुमति दिइने छैन ।  आगामी ६० दिन भित्र, इजरायलले सेना फिर्ता गर्नेछ । अन्ततः  दुवै पक्षका नागरिक, चाँडै सुरक्षित रूपमा आफ्नो घर समुदायमा फर्केर आफ्नो व्यवसाय सञ्चालन  र  जीवन यापनमा सक्रिय हुने छन् । 
 
बाइडेनले फ्रान्स र अन्य साझेदारहरूसँग मिलेर सम्झौता पूर्ण र प्रभावकारी रूपमा कार्यान्वयन गरी सुरक्षाको सुनिश्चित गर्न आवश्यक सहयोग प्रदान गरिने बताउदै यो प्रयासले लामो समयदेखि द्वन्द्वमा संलग्न इजरायल र लेबनानको भविष्य सुरक्षित हुने उल्लेख गर्नु भएको छ ।  एजेन्सी