बाजुरा । स्वामीकार्तिक खापर गाउँपालिकाको उपाध्यक्ष पदका मंसिर १६ गते हुने उपनिर्वाचनमा नेकपा माओवादी केन्द्र र राष्ट्रिय प्रजातन्त्र पार्टी (राप्रपा)ले उम्मेदवारी फिर्ता लिएका छन् । 

माओवादी केन्द्रकी उम्मेदवार राजु कुमारी विक र राष्ट्रिय प्रजातन्त्र पार्टी राप्रपाकी उम्मेदवार सुनादेवी थापा भोटे धामीले उम्मेदवारी फिर्ता लिनुभएको हो । उहाँहरुले आज आफ्नो उम्मेदवारी फिर्ता लिनुभएको  मुख्य निर्वाचन अधिकृत सञ्जीव पोखरेलले जानकारी दिनुभएको छ ।  

गाउँपालिकामा रिक्त रहेको उपाध्यक्ष पदका लागि पाँच दलले मनोनयन दर्ता गराए पनि आज अन्तिम समयमा माओवादी केन्द्र र राप्रपाकी उम्मेदवारले फिर्ता लिएका हुन् । विसं २०७९ मा भएको स्थानीय तह निर्वाचनमा नेपाली कांग्रेसबाट निर्वाचित उपाध्यक्ष मैनादेवी जोशीको २०८० माघ ४ गते निधन भएपछि उपनिर्वाचन हुन लागेको हो । 

रिक्त पदका लागि सत्तारुढ दल नेपाली कांग्रेस, नेकपा एमाले र नेकपा एकीकृत समाजवादी चुनावी प्रतिस्पर्धा हुने भएको छ । यहाँ २०७९ को स्थानीय तह निर्वाचनमा कांग्रेस उम्मेदवार जोशीले एक हजार आठ सय १० मत ल्याउनुभएको थियो ।  

उपनिर्वाचनमा हाल नौ मतदानस्थल र सात हजार चार सय ६० मतदाता रहेका छन् । मनोनयन दर्ता गराएका तीन दलका उम्मेदवारलाई आज नै  चुनाव चिन्ह प्रदान गरिने मुख्य निर्वाचन अधिकृतको कार्यालयले जनाएको छ ।