काठमाडौँ । नेपालमा उत्पादित विद्युत् भोलि शुक्रबारदेखि  बंगलादेशमा निर्यात हुने भएको छ । 

नेपालमा उत्पादित विद्युत् बंगलादेशमा निर्यात गर्न  भारतले अनुमति दिएको छ । भारतको केन्द्रीय विद्युत् नियमन आयोग (सीईआरसी) ले नेपाललाई बंगलादेशमा विद्युत् निर्यात गर्न अनुमति दिएको हो ।

भारतको अनुमतिसँगै  नेपालको विद्युत् बंगलादेशमा निर्यात गर्न बाटो खुलेको हो ।  नेपाल विद्युत् प्राधिकरणका प्रवक्ता चन्दन घोषले शुक्रबार मध्याह्न १२ : ४५ बजेबाट ४० मेगावाट विद्युत् निर्यात हुने जानकारी दिनु भएको छ । तर, यो याममा एक दिनमात्र निर्यात हुने उहाँले बताउनुभयो । 

यसअघि भारतको सीईआरसीले अनुमति नदिएपछि नेपालबाट बंगलादेश विद्युत् निर्यात योजना अनिश्चित बनेको थियो । नेपालबाट भारतको बाटो हुँदै ४० मेगावाट विद्युत् बंगलादेश निर्यात गर्ने विषयमा तीन देशका कम्पनीबीच १७ असोजमा सम्झौता भएको थियो ।