काठमाडौँ । कञ्चनपुरकी निर्मला पन्त हत्या प्रकरणमा आफू प्रत्यक्षदर्शी भएको भन्दै अन्तर्वार्ता दिएका एक व्यक्तिलाई प्रहरीले नियन्त्रणमा लिएको छ । निर्मला पन्त हत्या प्रकरणमा अफू प्रत्यक्षदर्शी रहेको भन्दै सनसनीपूर्ण अन्तरवार्ता दिने गोरखाका नवराज अर्याललाई आज केन्द्रीय अनुसन्धान ब्यूरो (सीआईबी)को टोलीले पक्राउ गरेको हो । 

गलत विवरणसहित दुष्प्रचार गरेको आरोपमा अर्याललाई नियन्त्रणमा लिइएको प्रहरीले जनाएको छ । ‘उनले टेलिभिजनमा दाबी गरेका सबै विवरण झुठा हो’, केन्द्रीय अनुसन्धान ब्यूरोका एसपी बोगटीले भन्नुभयो, ‘त्यो विषयमा सोधपुछका लागि ल्याएका हौं ।’

अर्यालले आफूलाई खानेपानी विभागको सवारी चालकका रुपमा चिनाएका थिए । त्यसक्रममा कञ्चनपुर पुगेको बेला निर्मलाको बलात्कार हुँदै गरेको देखेको विवरण उनले प्राइम टेलिभिजनको एक कार्यक्रममा बताएका थिए । पत्रकार ऋषि धमलासंग अर्यालले दिएको अन्तवार्ता यतिबेला सामाजिक संजालमा भाइरल भएको छ ।

अन्तर्वातामा अर्यालले तीनजना "हाई प्रोफाइल" व्यक्तिहरुले बलत्कार पछि हत्या गरेको दाबी गर्नुभएको थियो । 

अन्तर्वार्ता लिने टेलिभिजन कार्यक्रम प्रस्तोता ऋषि धमलालाई पनि सीआईबीले कार्यालयमा बोलाएको छ ।