काठमाडौँ । राष्ट्रिय स्वतन्त्र पार्टी (रास्वपा)ले आज बालुवाटारमा वृहत् प्रदर्शन गर्ने भएको छ ।  दिउँसो १२ बजे बालुवाटारमा वृहत् प्रदर्शन गर्ने रास्वपाले जानकारी दिएको हो । 

सभापति रवि लामिछानेलाई सहकारी ठगी र संगठित अपराध कसुरमा प्रहरीले कात्तिक २ गते पक्राउ गरेपछि रास्वपाले प्रदर्शन गर्दै आएको छ । ‘अधिनायकवादी दुई तिहाइ सरकारको राजनीतिक प्रतिशोध र दम्भको स्रोत खोज्न’ आज  बालुवाटारमा प्रदर्शन गर्न लागिएको पार्टी कार्यवाहक प्रवक्ता मनिष झाले जानकारी दिनुभयो । 

चावाहिल‚कोटेश्वर‚कलङ्की चोक‚ ललितपुर‚ स्वयम्वु वनस्थली बालाजु एरिया‚सामाखुसी चोक र महारजगञ्ज चोकबाट र्‍याली लिएर बालुवाटार पुग्ने  झाले बताउनुभयो । यी सबै स्थानबाट विहान ११ बजे र्‍याली निकालेर १२ बजे बालुवाटार पुग्ने उहाँले बताउनुभयो । 

विरोध प्रदर्शनको कमान्डर पुकार वमलाई तोकिएको छ । यस्तै वाग्मती प्रदेश सभापति अच्यूतम लामिछाने‚सुमना श्रेष्ठ‚ सन्तोष परियार‚ डिपी अर्याल र स्वर्णीम वाग्लेलाई विभिन्न स्थानको कमाण्डर तोकिएको छ ।  आन्दोलनलाई उहाँहरूले नै सम्बोधन गर्ने झाले जानकारी दिनुभयो ।