काठमाडौँ । माओवादी केन्द्रका अध्यक्ष पुष्पकमल दाहालले सहकारीको रकम ठगी गरेको आरोप लागेका सत्तारुढ दलका नेताहरूलाई सरकारले छानबिनको दायरामा पनि नल्याएको भन्दै प्रश्न गर्नुभएको छ । 

सहकारी रकम बचत अपचलनसम्बन्धी छानबिन गर्न गठित संसदीय समितिको प्रतिवेदनले दोषी ठहर्याएका एमाले र कांग्रेसका नेताहरूलाई छानबिन नगरेको दाहालको भनाइ थियो ।

माओवादी केन्द्रले शनिबार भृकुटीमण्डपमा आयोजना गरेको खबरदारीसभालाई सम्बोधन गर्दै दाहालले सहकारी ठगीको आरोप लागेका एमाले र कांग्रेस नेताहरूलाई छानबिन किन नगरेको भनेर प्रश्न गर्नुभयो । "त्यही प्रतिवेदनमा नाम उल्लेख भएका एमालेसँग सम्बन्धित व्यक्तिलाई छानबिन, गिरफ्तार गर्न नपर्ने ? कांग्रेसको पनि नाम छ त्यहाँ, त्यो नामलाई पनि केही गर्न नपर्ने ?" दाहालले भन्नुभयो, "राजनीतिक पूर्वाग्रहले प्रतिपक्षलाई मात्रै गिरफ्तार गर्ने कुरा बेठिक छ ।"  

सरकारी ठगहरूलाई कारबाही गर्नुपर्छ भन्नेमा माओवादी स्पष्ट रहेको बताउँदै संसदीय छानबिन समिति बनाउने बेलाको प्रसंग उल्लेख गर्नुभयो । "सहकारीसँग सम्बन्धित ठगहरूलाई कारबाही गर्नुपर्छ भन्ने कुरामा हामी कहीँ कन्फ्युजनमा थिएनौं । संसद्‍मा सहकारीसँग सम्बन्धित छानबिन गर्नेबारेमा बहस चल्यो । मैले समिति बनाउन उचित हुन्छ भन्ने कुरा राखेको हुँ । रवि लामिछानेसँग कुरा गर्दा समिति बनाएर छानबिन गर्नु उचित हुन्छ, दोषी भए कारबाही हुन्छ, दोषी नभए उन्मुक्ति हुन्छ भने । त्यही भएर रविले पनि छानबिन समिति हुनुपर्छ भनेका हुन्, उहाँले भन्नुभयो, त्यतिबेला छानबिन समिति बन्नु हुन्न भन्ने र रविलाई जोगाउने केपी ओली हुन् । अहिले राजनीतिक पुर्वाग्रह राखेर थुनामा राखिएको हो," उहाँले भन्नुभयो ।