काठमाडौँ ।  असोज ११ र १२ गतेको अविरल वर्षासँगै आएको बाढीपहिरोबाट शहरी विकास मन्त्रालय मातहतका क्षतिग्रस्त पूर्वाधार निर्माण गर्न करिब २ अर्ब ८८ करोड ३४ लाख रुपैयाँ लागत अनुमान गरिएको छ । 

शहरी विकास मन्त्रालयले आज पत्रकार सम्मेलन गर्दै विपदबाट भत्किएका संरचना सुधार तथा पुनःनिर्माण गर्न  सो लागत अनुमान गरेको जनाएको छ । मन्त्रालयकी प्रवक्ता विनु बज्राचार्यले शहरी विकास तथा भवन निर्माण विभाग अन्तर्गत स्वास्थ्य चौकी, सडक, सडक बत्ती, उद्यान पार्क, खेलमैदानमा विपद्ले क्षति पु¥याएको जानकारी दिनुभयो । 

‘स्थानीय पूर्वाधार विभाग अन्तर्गत २७ सडक खण्ड तथा २८ झोलुङ्गे पुल आंशिक क्षति र ३२ झलुङ्गे पुल पूर्णरुपमा क्षति पुगेको छ’ उहाँले भन्नुभयो– ‘यी संरचना पूर्णरुपमा निर्माण तथा सुधार गर्न १ अर्ब ७७ करोड चार लाख रुपैयाँ लागत अनुमान गरिएको छ ।’

बज्राचार्यले अधिकार सम्पन्न बागमती सभ्यता एकीकृत विकास समिति अन्तर्गत बागमती, मनोहरा, धोबिखोला, विष्णुमती, नख्खु, हनुमन्ते, कर्मनासा नदीमा थुपारेको माटो तथा गेग्रान निकाल्न  १२ करोड ८१ लाख रुपैयाँ लागत अनुमान गरिएको जानकारी दिनुभयो । 

‘अधिकार सम्पन्न बागमती सभ्यता एकीकृत विकास समितिबाट निर्माण भएका नदी तटबन्ध, पर्खाल लगायतका अन्य संरचनामा क्षति पुगेको छ’ उहाँले भन्नुभयो– ‘यी संरचना बनाउन अनुमानित ७० करोड रुपैयाँ लाग्ने छ ।’

उहाँका अनुसार काठमाडौँ उपत्यका विकास प्राधिकरण अन्तर्गत चाँगुनारायण, मध्यपुरथिमी, र सूर्यविनायक नगरपाालिकामा पर्खाल भत्किएको, सूर्यविनायक नगरपालिकामा सडक भासिएको, पुलमा क्षति, धोविखोला अन्तर्गत खाउला छेउका पर्खाल, करिडोरका बाटो तथा अन्य पूर्वाधारमा क्षति पुगेको छ । ‘यी संरचना बनाउन तथा सुधार गर्न  ११ करोड ४६ लाख रुपैयाँ लाग्ने छ’ उहाँले भन्नुभयो ।