काठमाडौँ । भौतिक पूर्वाधार तथा यातायात मन्त्रालयले बीपी राजमार्ग दशैं अगाडि पूर्णरुपमा सञ्चालन हुन नसक्ने निश्कर्ष निकालेको छ । 

बिहीबार सिंहदरबारमा पत्रकार सम्मेलन गर्दै मन्त्रालयले बीपी राजमार्गको चौकी डाँडादेखि कालढुंगा सडकखण्डमा बाढीका कारण सडक नै बगाएकाले दशैंअगाडि पूर्णरुपमा सञ्चालन हुन नसक्ने जनाएको हो ।

यसको विकल्पका रुपमा अन्य रुटहरुलाई सहज ढंगले सुचारु गर्ने काम भइरहेको मन्त्रालयका सचिव केशवकुमार शर्माले जानकारी दिनुभएको छ । 

उक्त सडकखण्डमा पहाड काटेर सडक बनाउने अवस्था नरहेकाले पर्खाल नै उठाउनुपर्ने देखिएको उहाँले बताउनुभयो । उहाँका अनुसार बाढीका कारणबीच बाटोमा फसेका सवारीसाधानलाई निकाल्न खोला किनार अस्थायी सडक निर्माणको काम भइरहेको छ । 

दशैंअघि उपत्यका बाहिरिने अन्य राजमार्ग भने सुचारु हुने उहाँको भनाइ छ । बाढीका कारण ८ स्थानका पुलमा क्षति भएको र सम्भव भएका स्थानमा बेलिब्रिज राख्ने तयारी भइरहेको सचिब शर्माले बताउनुभएको छ । 

वर्षाका कारण आएको बाढीले ३४ वटा राजमार्गहरूका ८ सय ५ स्थानमा पहिरो गइ सडक अवरुद्ध भएकोमा ७७४ स्थानको पहिरो हटाई २९ वटा राजमार्गमा यातायात सुचारु गरिएको मन्त्रालयले जनाएको छ ।