काठमाडौँ । अष्ट्रेलियामा अध्ययन गर्नका लागि अन्तर्राष्ट्रिय विद्यार्थीको भिसा आवेदन घटेको छ ।

नाइन इन्टरटेनमेन्ट पत्रिकामा बिहीबार प्रकाशित शिक्षा विभागको तथ्याङ्कअनुसार अगस्टमा विदेशबाट १५ हजार २ सय ७० अन्तर्राष्ट्रिय विद्यार्थी भिसा आवेदन दर्ता भएका  छन् ।  यो सङ्ख्या सन् २०२३ को अगस्ट (३० हजार ७ सय ३) को आधा हो ।

अष्ट्रेलियामा अध्ययन गर्ने भिसाका लागि जुलाईमा, १८ हजार ६ सय ९७ विद्यार्थीले आवेदन दिएका छन् । सन् २०२३ को त्यही महिनामा ३६ हजार २ सय ७ विदेशी विद्यार्थीले आवेदन हालेका थिए । हाल अष्ट्रेलिया सरकारले अन्तर्राष्ट्रिय विद्यार्थी भिसाको आवेदन शुल्क ७ सय १० अष्ट्रेलियाली डलर बाट बढाएर एक हजार ६ सय अष्ट्रेलियाली डलर बनाएको छ । 

सरकारले अगस्टमा अष्ट्रेलियाको उच्च आप्रवासी प्रवेशलाई घटाउने बृहत् रणनीतिको रूपमा २०२५ मा विश्वविद्यालय र व्यावसायिक शिक्षा प्रदायकमा नयाँ अन्तर्राष्ट्रिय विद्यार्थी भर्नालाई २ लाख ७० हजारमा सीमित गर्ने घोषणा गरेको थियो ।  नयाँ तथ्याङ्कअनुसार अष्ट्रेलियामा अन्तर्राष्ट्रिय विद्यार्थीको दोस्रो ठूलो स्रोत भारतबाट भिसा आवेदन जुलाई र अगस्ट २०२३ को १३ हजार ४७  बाट  ६६.४ प्रतिशतले घटेर २०२४ को सोही अवधिमा चार हजार ३८३ मा झरेको छ ।

यसैगरी, फिलिपिन्सको आवेदन सङ्ख्या पाँच हजार १२६ बाट ८४९ र पाकिस्तानको चार हजार २३४ बाट घटेर ६१६ मा झरेको छ । अन्तर्राष्ट्रिय विद्यार्थीका रूपमा सबैभन्दा धेरै अष्ट्रेलिया जाने चिनिँया विद्यार्थीको भिसा आवेदन सन् २०२३ र २०२४ को बीचमा १० प्रतिशत भन्दा कमले घटेको छ ।

अष्ट्रेलिया विश्वविद्यालयको सर्वोच्च निकाय )युनिभर्सिटिज अस्ट्रेलिया) ले विश्वविद्यालयलाई सरकारको प्रस्तावित विद्यार्थी सीमाले देशको अर्थव्यवस्थालाई अर्बौं डलर घाटा लाग्नेछ भने यसको परिणाम स्वरूप उच्च शिक्षा क्षेत्रमा हजारौं रोजगारी गुम्नेछन्।  एजेन्सी