काठमाडौँ । इजरायलले हवाई आक्रमण बढाई देशमा स्थलगत आक्रमण शुरु गरेपछि लेबनानले आफ्नो स्वास्थ्य प्रणालीलाई निरन्तरता दिन कठिनाई भइरहेको विश्व स्वास्थ्य सङ्गठनका प्रमुख टेड्रोस अधानोम गेब्रेयससले मङ्गलबार चेतावनी दिनुभएको छ । 

हाल लेबनानमा मृत्यु हुनेको सङ्ख्या बढ्दै गइरहेको र अस्पताल बिरामी तथा घाइतेहरुले भरिएको उल्लेख गर्दै उहाँले यस्तो चेतावनी दिनुभएको हो ।  उहाँका अनुसार लगातारका सङ्कटले स्वास्थ्य प्रणाली कमजोर भएको छ भने आवश्यकताको सामना गर्न लेबनानले गरेको सङ्घर्षको डब्ल्यूएचओले मुल्याङ्कन गरिरहेको छ ।

इजरायलले गत महिना गाजामा भएको युद्धबाट आफ्नो ध्यान लेबनानतर्फ केन्द्रित गरेको थियो । इरान समर्थित हमासद्वारा अक्टोबर ७ मा भएको आक्रमणपछि इजरायलले आफ्नो उत्तरी सिमाना सुरक्षित गर्न थालेको थियो ।

बेरुत र यसको दक्षिणी उपनगरमा इजरायली आक्रमणसहितको लडाईमा गत सातादेखि एक हजारभन्दा बढी व्यक्तिको मृत्यु भएको छ । टेड्रोसले जेनेभामा अरब लिगका राजदूतहरूसँग भेटेर परिस्थितिबारे छलफल गर्नुभएको थियो । शरणार्थीसहित बिरामी, स्वास्थ्यकर्मी र नागरिकलाई सुरक्षित गरी उनीहरूलाई आवश्यक पर्ने स्वास्थ्य सेवा प्रदान गर्नुपर्ने उहाँले बताउनुभएको छ ।
 
डब्ल्यूएचओले लेबनानी स्वास्थ्य मन्त्रालयसँग सहकार्य गरी अस्पतालमा पर्याप्त चिकित्सा आपूर्ति सुनिश्चित गर्न र स्वास्थ्यकर्मीलाई प्रशिक्षित गरिएको छभने सबैभन्दा कमजोरका लागि आवश्यक स्वास्थ्य सेवा कायम राख्न सक्नुपर्ने उल्लेख गर्नुभएको छ । एजेन्सी