बागलुङ । सहकारी ठगी आरोपमा इमेज बचत तथा ऋण सहकारी संस्थाका संस्थापक अध्यक्ष देवकुमार नेपालीलाई जिल्ला अदालतले पुर्पक्षका लागि थुनामा पठाएको छ ।

मंगलबार भएको थुनछेक बहसपछि नेपालीलाई न्यायाधीश रमेशकान्त अधिकारीको इजलासले पुर्पक्षका लागि पठाएको हो ।

मंगलबार नेपालीको तर्फबाट वरिष्ठ अधिवक्ता केशवराज पराजुली र अधिवक्ता राम शर्माले बहस गर्नुभएको थियो । जाहेरवालाको तर्फबाट अधिवक्ता रमेशबहादुर खड्का, सरिता केसी र सरकारी वकिल पूर्णप्रसाद शर्माले बहस गर्नुभएको थियो । 

सोही मुद्दाका अर्का आरोपी ओमप्रसाद दर्जीलाई भने १ लाख ५० हजार धरौटीमा रिहा हनुभएको छ । दर्जी नेपालीका दाजु हुनुहुन्छ । 

सहकारीको १ अर्ब ५४ करोड रुपैयाँ हिनामिनापछि नेपाली २०८० को जेठ ४ गतेदेखि फरार हुनुहुन्थ्यो ।  गत माघमा नेपालीविरुद्ध रेड कर्नर नोटिस जारी भएको थियो । नेपालीलाई गत शुक्रबार भारतको नयाँ दिल्लीबाट पक्राउ गरेर नेपाल ल्याइएको हो । 

नेपाली विरुद्ध १ हजार ५ सय ४३ जना बचतकर्ताले आफ्नो बचत रकम ठगी गरेको आरोपमा जाहेरी दिएका थिए । जिल्ला सरकारी वकिलको कार्यालय बागलुङले ताराबहादुर कुँवर सहितका पीडितको जाहेरीले भन्दै २०८० असार ३१ गते नेपालीसहित १० जनाविरुद्ध सहकारी ठगी मुद्दा दायर गरेको थियो । साउन ४ गतेको आदेशले नेपालीबाहेक संचालक र कर्मचारी समेतलाई पुर्पक्षका लागि थुनामा पठाएको थियो ।