काठमाडौँ । मेडिकल व्यवसायी दुर्गा प्रसाईंविरुद्ध जिल्ला अदालत काठमाडौंमा मुद्दा दायर गरिएको छ । जिल्ला सरकारी वकिल कार्यालय काठमाडौँले  विद्युतीय कारोबार ऐनको दफा ४७ अनुसार सजाय मागदाबी गर्दै मुद्दा दायर गरेको हो ।

मुद्दा आज दर्ता भइसकेकाले मंगलबार अदालतले बयान लिने जिल्ला सरकारी वकिल कार्यालयका प्रमुख सन्देश श्रेष्ठले बताउनुभयो । 

प्रसाईंले एक महिलामाथि गरेको टिप्पणी युटुब च्यानलसहित सामाजिक सञ्जालमा सार्वजनिक भएपछि उहाँविरुद्ध विद्युतीय कारोबार ऐनको उल्लंघन गरेको भन्दै उजुरी परेको थियो । सोही उजुरीका आधारमा उहाँ पक्राउ पर्नुभएको थियो । 

नेपाल प्रहरीको साइबर ब्युरोले अनुसन्धान पूरा बुझाएको प्रतिवेदनका आधारमा जिल्ला सरकारी वकिलले मुद्दा दायर गरेको हो । मागदाबी ठहर भए  प्रसाईंलाई पाँच वर्षसम्म कैद वा एक लाखसम्म जरिवाना वा दुवै सजाय हुन सक्छ ।