नुवाकोट ।  काठमाडौँबाट पोखरा जाँदै गरेको माइक्रोबस नुवाकोटमा दुर्घटना भएको छ । 

पोखरा जाँदै गरेको  पृथ्वीराजमार्ग कम्पनी प्रालिमार्फत सञ्चालित ग १ ख ४५३५ नम्बर माइक्रोबस आज  छहरे–टोखा सडक खण्डअन्तर्गत नुवाकोटको शिवपुरी गाँउपालिका–७ मा दुर्घटना भएको हो । दुर्घटनामा १२ जना यात्रु घाइते भएको जिल्ला प्रहरी प्रमुख शान्तिराज कोइरालाले जानकारी दिनुभएको छ ।

जिल्ला प्रहरी प्रमुख कोइरालाका अनुसार घाइतेमध्ये दुई जनाको अवस्था गम्भीर छ ।  काठमाडौँबाट नुवाकोट हुँदै पोखरा जाँदै गरेको माइक्रोबस दिउँसो १ बजे अदुवारीमोडमा अनियन्त्रित हुँदा सडकबाट करिब ५० मिटर तल पुगेको घटनास्थल पुग्नुभएका प्रहरी नायव उपरीक्षक तिलक भारतीले जानकारी दिनुभयो ।

भारतीका अनुसार बसमा १८ जना सवारमध्ये गम्भीर दुईसहित १२ जनालाई उपचारका लागि काठमाडौँ पठाइएको छ । प्रहरीका अनुसार दुर्घटनास्थलमा ठूलोभीर भएपनि मौवाको रुखमा गाडी अड्किएकाले ठूलो क्षति हुनबाट जोगिएको हो ।