पर्सा । मुलुकमा पछिल्लो समय कार आयात घटेको छ ।  मोटरसाइकल र स्कुटरको आयात भने बढेको छ । वीरगञ्ज भन्सारले  चालु आर्थिक वर्षको दुई महिनामा चारपाङ्ग्रे सवारीको आयात घटेको जनाएको छ । 

भन्सारका अनुसार चालु आवको भदौ मसान्तसम्ममा यस नाका हुँदै  ४२ करोड ४० लाख २ हजार रुपैयाँ मूल्यपर्ने दुई सय ३० वटा जिप, कार र भ्यान आयात भएको छ । आव २०८० र ८१ को यही अवधिमा . ४५ करोड ९० लाख ६१ हजार रुपैयाँ मूल्य पर्ने ३ सय ६ वटा जिप, कार र भ्यान आयात भएको थियो । 

.आव २०८०र८१ को भदौ मसान्तको तुलनामा चालु आवको सोही अवधिमा चार पाङ्ग्रे सवारी सङ्ख्याका आधारमा २४ दशमलव ८४ प्रतिशतले आयात घटेको हो । वीरगञ्ज भन्सार कार्यालयका प्रमुख भन्सार प्रशासक दीपक लामिछानेले चालु आवको दुई महिना अवधिमा चारपाङ्ग्रे सवारीसाधनको आयात घटेको बताउनुभयो । 

‘गत आवको तुलनामा चालु आवको दुई महिनामा पेट्रोलियम पदार्थबाट चल्ने सवारीसाधन र इलेक्ट्रिक सवारीसाधन दुवैको आयात घटेको छ’ उहाँले भन्नुभयो– ‘इलेक्ट्रिक सवारीसाधन वीरगञ्ज भन्सार नाका भन्दा उत्तरी नाकाबाट धेरै भित्रिएको छ । यो नाकाहुँदै सवारीसाधनको  समग्र आयात घटेसँगै राजस्व सङ्कलनमा प्रत्यक्ष असर परेको छ ।’

चालु आव २०८१र८२ को भदौ मसान्तसम्ममा ६ करोड एक लाख ७० हजार मूल्य पर्ने ५४ वटा इलेक्ट्रिक कार, जिप र भ्यान आयात भएका छन् । आव २०८०र८१ को सोही अवधिमा  १३ करोड २५ लाख ५५ हजार रुपैयाँ मूल्य पर्ने ५८ वटा इलेक्ट्रिक कार, जिप र भ्यान आयात भएका थिए । गत आवको तुलनामा चालु आवमा ६ दशमलव ९० प्रतिशतले आयात घटेको हो ।

चालु आवको भदौ मसान्तसम्ममा ६ करोड दुई लाख २६ हजार मूल्यपर्ने २८ वटा ट्रक, मिनीट्रक आयात भएको छ । गत आवको सोही अवधिमा  १६ करोड ८० लाख ८१ हजार मूल्यपर्ने ६८ वटा ट्रक, मिनीट्रक आयात भएको थियो । गत आवको तुलनामा चालु आवको यही अवधिमा ट्रक र मिनीट्रकको आयात ५८ दशमलव ८२ प्रतिशतले गिरावट आएको हो । 

चालु आवको दुई महिनामा आठ करोड दुई लाख ३२ हजार मूल्यपर्ने ३८ वटा पिकअप तथा डेलिभरी भ्यान आयात भएको छ । गत आवको सोही अवधिमा  नौ करोड ९३ लाख आठ हजार मूल्य पर्ने ८६ वटा पिकअप तथा डेलिभरी भ्यान आयात भएको थियो । गत आवको तुलनामा चालु आवको यही अवधिमा  ५५ दशमलव ८१ प्रतिशतले आयात घटेको छ । 

चालु आवको भदौ मसान्तसम्ममा १७ करोड २४ लाख चार हजार मूल्यपर्ने ७६ वटा मिनिबस र माइक्रोबस आयात भएको छ । गत आवको यही अवधिमा . सात करोड १९ लाख ९१ हजार मूल्य पर्ने ३४ वटा मिनीबस र माइक्रोबस आयात भएको थियो । चालु आवको दुई महिनामा गत आवको तुलनामा मिनिबस र माइक्रोबसको आयात एक २३ दशमलव ५३ प्रतिशतले बढेको छ ।

चालु आवको सुरुवाती दुई महिनामा चारपाङ्ग्रे सवारीसाधनको आयात घटे पनि दुईपाङ्ग्रे सवारीसाधनको आयात दोब्बरले बढेको छ । चालु आवको भदौ मसान्तसम्ममा वीरगञ्ज भन्सार हुँदै  दुई अर्ब सात करोड ८४ लाख २२ हजार रुपैयाँ मूल्यपर्ने  १६ हजार तीन सय ८४ वटा मोटरसाइकल आयात भएको छ । 

गत आवको यही अवधिमा  एक अर्ब १३ करोड ५४ लाख ६४ हजार मूल्यपर्ने ९ हजार दुई सय ६४ वटा मोटरसाइकल आयात भएको थियो । गत आवको यही अवधिको तुलनामा चालु आवमा मोटरसाइकलको आयात ७६ दशमलव ८६ प्रतिशतले वृद्धि भएको भन्सार कार्यालयले जनाएको छ ।