रामेछाप ।  मन्थली नगरपालिका–५ स्थित सुनारपानीमा  जीप दुर्घटना हुँदा एक जनाको मृत्यु भएको छ । दुर्घटनामा  ६ जना घाइते भएका छन् । 

सुदूरमुकाम मन्थलीबाट सुनारपानी हुँदै मन्थली–४ सालुतर्फ जाँदै गरेको बा १८ च १८३९ नम्बर को डबल क्याप बलेरो जीप आज दिउँसो १ बजे दुर्घटना भएको हो । जीप अनियन्त्रित भई सडकबाट करिब १ सय ५० मिटर तल खसेको रामेछापका प्रहरी नायव उपरीक्षक प्रदीपकुमार सिंहले जानकारी दिनुभएको छ । 
 । 
दुर्घटनामा त्यही वडाकी ६० वर्षीया पद्ममाया नेपालीको घटनास्थलमै मृत्यु भएको प्रहरीले जनाएको छ । दुर्घटनामा  त्यही ठाउँका ६ जना घाइते भएका छन् । घाइते मध्ये चालक ४२ वर्षीय गुनकुमार थापामगर र ६९ वर्षीय दिलीपकुमार बरुवाललाई उपचारका लागि काठमाडौँ पठाइएको छ । 
 
अन्य घाइतेहरु ३४ वर्षीया सीता नेपाली, २५ वर्षीया सुजीता रसाइली, २५ वर्षीया सरिता नेपाली र सरिताकी पाँच महिनाका छोरी रोनिषा छन् । सामान्य घाइतेको मन्थलीस्थित रामेछाप सामुदायिक अस्पताल र मन्थली अस्पतालमा उपचार भइरहेको प्रहरी नायव उपरीक्षक सिंहले जानकारी दिनुभयो ।