झापा । जिल्ला ट्राफिक कार्यालयले चालु आर्थिक वर्षको पहिलो दुई महिनामा ६६ लाख १५ हजार रुपैयाँ राजस्व सङ्कलन गरेको छ । 

९ हजार सात सय ६९ सवारीसाधन कारबाहीबाट उल्लेखित राजस्व सङ्कलन गरिएको कार्यालयका प्रहरी नायव निरीक्षक पूर्णप्रसाद गौतमले जानकारी दिनुभयो । 

त्यस अवधिमा सबैभन्दा धेरै एक हजार ६ सय ८४ जिप, कार तथा भ्यानलाई कारबाही गर्दा १० लाख पाँच हजार पाँच सय राजस्व सङ्कलन भएको छ । यसैगरी एक हजार दुई सय ३१ मोटरसाइकल, छ सय ९६ ट्रक, दुई सय १० बस, एक सय ७४ टिपर, एक सय ८४ ट्रयाक्टर र तीन सय छ टेम्पो कारबाहीमा परेका छन् ।

कार्यालयको तथ्याङ्कानुसार साउन १० र भदौमा छ गरी सवारी दुर्घटनामा परी १६ जनाको मृत्यु भएको छ । सोही अवधिमा दुर्घटनामा परी ३२ जना सख्त घाइते र तीन सय ६० जना सामान्य घाइते भएका थिए ।

प्रनानि गौतमकानुसार पछिल्लो दुई महिनामा जिल्लाभरिमा दुई सय ३६ दुर्घटना भएका छन् । यस अवधिमा दुई सय २६ मोटरसाइकल, चार ट्रक, ११ बस, ३५ जिप÷कार, तीन ट्र्याक्टर, ४३ टेम्पो, एक टिपर र दुई अन्य सवारी दुर्घटनामा परेका थिए ।