हेटौँडा । मनहरी गाउँपालिका अध्यक्ष रञ्जन कालाखेतीेले पारिश्रमिक तथा सेवा सुविधा बापत् प्राप्त रकमबाट एकल महिलालाई पक्की घर बनाइदिनुभएको छ । 

मनहरी– ५ वसन्तपुरमा लामो समयदेखि आवासविहीन अवस्थामा रहनुभएकी सोनी राईलाई पक्की घर बनाएर आज हस्तान्तरण गर्नुभएको हो । अध्यक्ष कालाखेतीले पारिश्रमिक तथा सेवा सुविधाबापत् प्राप्त रकम कोष स्थापन गरी जम्मा गर्दै आउनुभएको छ । 

त्यो कोषबाट २ लाख १५ हजार खर्चेर राईलाई घर बनाइदिनुभएको उहाँले जानकारी दिनुभएको छ । आठ वर्ष अगाडि श्रीमान् नरबहादुरको काठ काट्न जाँदा लडेर मृत्यु भएपश्चात् उहाँ वसन्तपुरमा सानो छाप्रो बनाएर बस्दै आउनुभएको थियो ।

‘ज्याला मजदूरी गरेर जसोतसो जीवन धान्दै थिएँ । सानो काठको घर बनाएर त्यहीँ बस्दै आएकी थिएँ । पानी चुहिन्थ्यो । हावाहुरीले समस्या पाथ्र्यो । आफन्त र गाउँघरमा बास बस्दै आएकी थिएँ । अध्यक्षज्युको सहयोगले घर बन्यो, उहाँलाई धन्यवाद’ सोनीले भन्नुभयो ।

स्थानीय शान्ता अधिकारी र अन्य गाउँलेहरुले सोनीको अवस्थाबारे गाउँपालिका अध्यक्षलाई जानकारी गराएका हुन्। अध्यक्ष कालाखेतिले निर्वाचनका बेला जनताका बीचमा गरेको प्रतिवद्धता अनुसार आफूले पाउने सेवा सुविधा बापतको खर्च जनताको सेवामा समर्पित गर्दै आएको बताउनुभयो । 

उहाँले आगामी दिनमा पनि समस्यामा परेका जनताको सेवामा त्यो कोषको रकम खर्च गर्ने प्रतिवद्धता व्यक्त गर्नुभयो ।