काठमाडौँ । आईसीसी विश्वकप लिग-२ त्रिकोणात्मक सिरिजमा नेपाल घरेलु टोली क्यानडासँग १०३ रनको विशाल अन्तरले पराजित भएको छ । नेपालले ओडीआई इतिहासमा क्यानडासँग हारेको यो पहिलो पटक हो । 

विगतमा क्यानडासंग अपराजित रहेको नेपालले सोमबारको खेलमा भने निकै खराव व्याटिङ गर्यो । लय गुमाएको व्याटिङकै कारण नेपाल १०३ रनको विशाल अन्तरले पराजित हुन पुग्यो ।  

२ सय ५४ रनको लक्ष्य पछ्याएको नेपाल ४०.१ ओभरमा १५० रनमा अल आउट भयो । नेपालका करण केसीले २४ बलमा २ चौका र २ छक्कासहित सर्वाधिक २७ रन बनाए । ओपनर कुशल भुर्तेल १, आसिफ शेख २०, भीम सार्की १८, रोहित पौडेल ५, कुशल मल्ल १२, दीपेन्द्रसिंह ऐरी ८, सोमपाल कामी ६, सन्दीप लामिछाने २२ र गुलशन झा १५ रनमा आउट भए ।

क्यानडाका तीव्र गतिका बलर डिलोन हेलिगरले १० ओभरमा ३१ रन खर्चेर ५ विकेट लिए भने अखिल कुमार र अंश पटेलले २ २ विकेट लिए । सादविन जाफरले १ विकेट लिए ।

त्यसअघि टस हारेर पहिला ब्याटिङको निम्तो पाएको क्यानडाले ५० ओभरमा ८ विकेट गुमाउँदै २ सय ५३ रन बनाएको थियो । ४० ओभरमा १४९-५ को अवस्थामा रहेको क्यानडाले अन्तिम १० ओभरमा १०४ रन जोड्दै बलियो योगफल तयार गरेको थियो । 

नेपालका सोमपाल कामी र ललित राजवंशीले २-२ विकेट लिए । सन्दीप लामिछाने, गुलशन झा र रोहित पौडेलले १-१ विकेट लिए । नेपालले बुधबार ओमानसँग खेल्नेछ । नेपाल लिग-२ मा ५ खेलमा २ अंकका साथ सातौं स्थानमा छ । क्यानडा भने ९ खेलमा १० अंकका साथ दोस्रो स्थानमा पुगेको छ । नेदरल्यान्ड्स ८ खेलमा १२ अंकका साथ शीर्ष स्थानमा छ ।