काठमाडौँ ।  निर्वाचन आयोगले स्थानीय तहको उपनिर्वाचन आउने मंसिर १६ गते गर्नको लागि सुझाव दिएको छ।

निर्वाचन आयोगले  प्रधानमन्त्री केपी शर्मा ओलीसमक्ष स्थानीय तहको उपनिर्वाचनबारे परामर्श दिएको हो । प्रमुख आयुक्त दिनेशकुमार थपलियासहितका पदाधिकारीले आज प्रधानमन्त्रीलाई भेटघाट गरी मंसिर १६ गते आइतबार स्थानीय तहको उपनिर्वाचनको मिति तोक्न नेपाल सरकारलाई परामर्श दिनुभएको हो ।

स्थानीय तहमा हाल रिक्त जिल्ला समन्वय समितिका दुई प्रमुखसहित ४१ जनप्रतिनिधिको  बाँकी कार्यकालका लागि उपनिर्वाचनको तयारी भएको हो ।

 भेटघाटमा प्रधानमन्त्री ओलीले प्रस्ताव अध्ययन गरी नेपाल सरकारले छिटो मिति तोक्ने जनाउँदै निर्वाचनलाई मितव्ययीरुपमा स्वतन्त्र, निष्पक्ष र शान्तिपूर्ण ढङ्गले सम्पन्न गर्न आग्रह गर्नुभयो ।

त्यस अवसरमा उपप्रधानमन्त्री एवं अर्थमन्त्री विष्णुप्रसाद पौडेल, गृहमन्त्री रमेश लेखक, मुख्यसचिव एकनारायण अर्याल लगायत सहभागी हुनुहुन्थ्यो ।