काठमाडौँ । प्रमुख प्रतिपक्षी दल नेकपा (माओवादी केन्द्र)ले संसदको अवरोध कायमै राख्ने निर्णय गरेको छ । नेकपा एमालेका सचिव योगेश भट्टराईको अभिव्यक्तिले माओवादी जनयुद्ध, शान्ति सम्झौता र संविधानको मर्म र भावनालाई अपमान गरेको निष्कर्ष सहित माओवादी केन्द्रले संसदको अवरोध कायमै राख्ने निर्णय गरेको हो।

सचिव भट्टराईले बोलेकै दिन माओवादीले नियमापत्ति गरेको थियो । सभामुखले छानबिन गर्न निर्देशन दिएपछि माओवादीको विरोध रोकियो । तर बुधबार सभामुखले हिंसा शब्द असंसदीय नभएको निर्णय सुनाएपछि माओवादीले संसद अवरुद्ध गर्‍यो ।

संसदीय दलको शुक्रबार बसेको बैठकले संसद अवरुद्ध गर्नुपर्ने निष्कर्ष निकालेको छ । ‘जनयुद्धलाई जसरी हिंसामा लगेर अपमानित गरिएको छ, त्यो अपमानका विरुद्ध अझ सशक्त ढंगले प्रस्तुत हुनुपर्छ,’  बैठकमा संसदीय दलका नेता पुष्पकमल दाहाल प्रचण्डले भन्नुभयो । 

बैठक पछि प्रमुख सचेतक हितराज पाण्डेले भन्नुभयो, ‘सांसद भट्टराईको जनयुद्धलाइ अपमानित गरिएको छ, यसलाई नसच्याएसम्म संसदको अवरोधलाई निरन्तरता दिने निर्णय गरेका छौं ।’