बागलुङ ।  रुकुम पूर्वको पुथाउत्तरगङ्गा गाउँपालिकाकी उपाध्यक्ष भुपेन्द्रा बुढाको जीप दुर्घटनामा निधन भएको छ ।

गाउँपालिका उपाध्यक्ष ३३ वर्षीया  बुढाको बागलुङको गलकोट नगरपालिका–२ भुङ्खानीमा आज बिहान भएको जीप दुर्घटनामा निधन भएको छ । दुर्घटनामा ३३ वर्षीया बुढासँगै उहाँकी आमा ६१ वर्षीया गोपीमाया बुढा तथा अर्का एक पुरुषको समेत मृत्यु भएको  बागलुङका प्रहरी निरीक्षक प्रताप पौडेलले जानकारी दिनुभएको छ । 

बुढा २०७९ सालमा भएको स्थानीय तह निर्वाचनमा नेकपा माओवादीकेन्द्रबाट उपाध्यक्षमा निर्वाचित हुनुभएको हो ।  बुढा ४ हजार ५९ मत ल्याएर उपाध्यक्ष बन्नुभएको थियो । उहाँका निकटतम् प्रतिद्वान्दी  नेपाली कांग्रेसकी कमलाकुमारी मल्लले २ हजार १० मत प्राप्त गर्नुभएको थियो । 

प्रहरी निरीक्षक प्रताप पौडेलका अनुसार रा १ झ २०० नम्बर को सरकारी जीप शुक्रबार बिहान गलकोट–२ भुङ्खानीमा सडकबाट करिब ३ सय मिटर तल खसेको हो । तीनै जनाको घट्नास्थलमै ज्यान गएको उहाँले बताउनुभयो । घटनास्थलबाट एक घाइतेलाई उद्धार गरी उपचारका लागि धौलागिरी अस्पताल पठाइएको छ । 

रुकुम पूर्वका सहायक प्रमुख जिल्ला अधिकारी जीवनकुमार खड्काका अनुसार जीपमा पुथाउत्तरगङ्गा गाउँपालिकाका जनप्रतिनिधि र कर्मचारी सवार थिए । उपाध्यक्ष बुढा केही दिनअघि आमालाई लिएर काठमाडौँतर्फ जान लाग्नुभएको जानकारी पाएको उहाँले बताउनुभयो । 

दुर्घटनास्थलमा परिचयपत्र फेला परेपछि मात्र दुर्घटनामा उपाध्यक्ष बुढा परेको खुलेको  हो । बिहानै जीप दुर्घटनामा परे पनि स्थानीयले घाँस काट्न जाने बेला देखेपछि उनीहरुले स्थानीय प्रहरीलाई खबर गरेका थिए । जीपमा कति जना सवार थिए ? भन्ने एकीन नभएको सहायक प्रजिअ खड्काले बताउनुभयो ।