विराटनगर । कोशी प्रदेशका पूर्व मुख्यमन्त्री केदार कार्कीले आमरण अनशन तोड्नुभएको छ ।  प्रदेश सरकारका तर्फबाट आन्तरिक मामिला तथा कानुन मन्त्री लिलाबल्लभ अधिकारीले अनशनस्थलमा पुगेर मागहरू पूरा गर्ने प्रतिबद्दता जारी गरेपछि उहाँले अनशन तोडनुभएको हो । 

‘जनजीविकासँग प्रत्यक्ष सरोकार रहेका जायज मागहरूमा प्रदेश सरकारले सहमति जनाउँदै उपरोक्त सम्पूर्ण मागहरू मध्ये कतिपय माग कोशी प्रदेश सरकारको ०८१–०८२ को बजेटमा रकम विनियोजन भई कार्यान्वयनका क्रममा रहेकोमा सो विषयहरू तत्काल कार्यान्वयन गर्ने, स्वास्थ्य जस्ता गम्भीर केही विषयहरू समेतका सन्दर्भमा अनशनरत पूर्व मुख्यमन्त्री ज्यूसँग छलफल, समन्वय गरी सहमतिका आधारमा तत्काल कार्यान्वयन गर्ने,’ लिखित सहमतिमा उल्लेख छ ।

उक्त सहमतिपत्रमा मन्त्री अधिकारी र अनशनरत कार्कीले हस्ताक्षर गर्नुभएको छ ।