काठमाडौँ । दक्षिण एशियाली क्षेत्रीय सहयोग सङ्गठन (सार्क) का महासचिव गोलाम सरवारले भूटानका नरेश जिग्मे खेसर नाम्गेल वाङचुकसँग शिष्टाचार भेटवार्ता गर्नुभएको छ । हालै भूटानमा भएको भेटवार्तामा उहाँहरुबीच सार्कका गतिविधि र आगामी योजनाका सम्बन्धमा छलफल भएको सार्क सचिवालयले जनाएको छ । 

सार्कको नयाँ महासचिवमा सरवारको भूमिकाको प्रशंसा गर्दै भूटानी नरशले सार्कलाई पूर्ण सहयोग रहने प्रतिवद्धता व्यक्त गर्नुभएको थियो । त्यस अवसरमा उहाँहरुबीच सार्क क्षेत्रका जनताको बृहत्तर समृद्धिका लागि गरिएको परिकल्पनालाई साकार बनाउन र उद्देश्य प्राप्तिका दिशामा सार्कलाई अघि बढाउने बारेमा विचार आदानप्रदान गर्नुभएको सचिवालयले जनाएको छ । 

असार १८ देखि २२ गतेसम्म गर्नुभएको भूटान भ्रमणका क्रममा महासचिव सरवारले सार्क विकास कोष (एसडिएफ) को सचिवालयको अवलोकन गरी सार्कका आठवटै सदस्य राष्ट्रमा एसडिएफका आयोजनामा आधारित गतिविधिका बारेमा पनि छलफल गर्नुभएको सचिवालयले आज जारी गरेको प्रेस विज्ञप्तिमा जनाइएको छ ।