जनकपुर । बजेट पुनःलेखनको माग गर्दै मधेश प्रदेशसभाको आजको बैठक शुरु भएको केही बेरमै स्थगन भएको छ । लोकतान्त्रिक समाजवादी पार्टी (लोसपा) की सांसद  रानी शर्मा तिवारीले अवरोध गरेपछि बैठक स्थगन भएको हो । 

प्रदेशसभाको आजको बैठकमा प्रदेश सरकारका तर्फबाट अर्थमन्त्री भरतप्रसाद साहले पेश गर्नुभएको आर्थिक वर्ष २०८१/८२ को बजेटमाथि छलफल हुने तय भएको थियो । बिहान ११ बजेका लागि बोलाएको  बैठक ढिलो गरी शुरु भएको थियो । 

बैठक शुरु हुने बित्तिक्कै लोसपाकी सांसख शर्मा तिवारीले असार १६ गते मुख्यमन्त्रीलाई ध्यानाकर्षण पत्र बुझाएको र त्यस विषयमा सरकारको धारणा नआएसम्म बजेटमाथि छलफल गर्न नदिने बताउनुभयो । उहाँले भन्नुभयो– ‘माग पूरा नभएसम्म बजेटमाथि छलफल हुँदैन ।’

प्रदेश सभामुख रामचन्द्र मण्डलले प्रदेशसभाको बैठक १० मिनेटका लागि स्थगन गर्नुभए पनि अहिलेसम्म बस्न सकेको छैन । अहिले सभामुख मण्डलको उपस्थितिमा विभिन्न दलका नेता सम्मिलित बैठक प्रदेशसभा सचिवालयमा जारी छ ।

नेपाली कांग्रेस, जनता समाजवादी पार्टी, लोसपासहित चार दलले बुझाएको ध्यानाकर्षण पत्रको विषयमा आधिकारिक धारणा आएपछि मात्र बजेटमाथि छलफल हुनेछ ।

असार १ गते मधेस प्रदेश सरकारका तर्फबाट अर्थमन्त्री भरतप्रसाद साहले आर्थिक वर्ष २०८१/८२ का लागि ४३ अर्ब ८९ करोड २१ लाख ७० हजार रुपैयाँको बजेट प्रदेशसभामा पेश गर्नुभएको थियो । चालुतर्फ  १६ अर्ब ७ लाख १ हजार र पुँजीगततर्फ २७ अर्ब ८९ करोड १४ लाख ६९ हजार रुपैयाँ को बजेट सार्वजनिक गरिएको छे ।