काठमाडौँ । भारतीय प्रधानमन्त्री नरेन्द्र मोदीले मुलुकमा जारी गर्मीको अवस्था र मनसुनको सुरुआतको तयारीबारे समीक्षा गर्नुभएको छ । 

राजधानी नयाँदिल्लीमा आफ्नो निवासमा भएको बैठकमा उहाँलाई भारती मौसम विभाग (आइएमडी) को पूर्वानुमानअनुसार राजस्थान, गुजरात र मध्यप्रदेशका केही भागमा गर्मीको लहर जारी रहने सम्भावना रहेको जानकारी गराइएको छ । 

यस वर्ष मुलुकका अधिकांश भागमा मनसुन सामान्य र सामान्यभन्दा माथि र प्रायद्वीपीय भारतका केही भागमा सामान्यभन्दा तल रहने सम्भावना रहेको प्रधानमन्त्रीको कार्यालयले बताएको छ । 

प्रधानमन्त्री मोदीले आगलागीका घटना रोक्न र व्यवस्थापनका लागि उचित अभ्यास गर्न निर्देशन दिनुभयो । ‘अस्पताल र अन्य सार्वजनिक स्थानहरूको फायर अडिट र विद्युत सुरक्षा अडित नियमितरूपमा गर्नुपर्छ’ उहाँले भन्नुभयो । 

उहाँले जङ्गलहरूमा फायरलाइन मर्मत र बायोबासको उत्पादक प्रयोगका लागि नियमित अभ्यासको योजना बनाउनुपर्ने बताउनुभयो । उहाँले वनमा लागेको आगलागीको समयमै पहिचान र त्यसको व्यवस्थापनमा ‘वन अग्नि’ पोर्टलको उपयोगिताका बारेमा उल्लेख गर्नुभयो । 

स्रोतहरूका अनुसार मुलुकका धेरै भाग प्रचण्ड गर्मीको चपेटामा परेसँगै राष्ट्रिय रोग नियन्त्रण केन्द्र (एनसिडिसी) ले धेरै राज्यमा हिटस्ट्रोकबाट कम्तीमा ५६ जनाको मृत्यु भएको पुष्टि गरेको छ । 

भारतीय मौसम विभागले दक्षिण–पश्चिम मनसुन केरलको छटसँग ठोक्किएको र बिहीबार उत्तरपूर्वी भारतका केही भागमा अगाडि बढेको बताएको छ । यस वर्ष मनसुनको सुरुआत दुई दिनअघि भएको छ । मनसुनको शुरुवात सामान्यतया जुन १ मा हुन्छ । 

यस वर्ष केरलमा ठूलो मात्रामा प्रि–मनसुन वर्षा भएको छ । सन् २०२३ मा मनसुन सिजन (जुन–सेप्टेम्बर)  मा पूरा मुलुकमा वर्षा लामो अवधिको औसत ९४ प्रतिशत थियो ।