सिरहा । सिरहामा तीन वर्षीया बालिकाको हत्या आरोपमा प्रहरीले २जनालाई पक्राउ गरेको छ ।  

प्रहरीले सिरहा नगरपालिका—१८ जरुवा लक्ष्मिनियाँ टोलका रमेश यादवकी ३ वर्षीया छोरी रिया कुमारीको हत्या गरेको आरोपमा छिमेकी ४७ वर्षीय सोनादेवी र उनकी छोरी पूजाकुमारी यादवलाई पक्राउ  गरेको हो । 

प्रहरीले उनीहरुलाई आज सार्वजनिक गरेको छ । घटनामा संलग्न भएको आशंका गरिएका सोनादेवीका श्रीमान् धनिकलाल यादव भने फरार रहेका छन् । 

गएको  बुधबार बिहानदेखि हराइरहेकी रियाको शव खोजतलासका क्रममा दुई दिनपछि शुक्रबार राति छिमेकी धनिकलाल यादवको घरमा फेला परेको थियो । बालिकाको शव धनिकलालको घरमा भेटिएपछि उनीहरुलाई पक्राउ गरिएको प्रहरी नायव उपरीक्षक मुक्तिनाथ सापकोटाले जानकारी दिनुभएको छ । 

दुई परिवारबीच घरायसी झगडा हुँदै आएकाले त्यही  रिसइबीका कारण बालिकाको हत्याभएको हुनसक्ने प्रहरीको अनुमान छ ।