बैतडी । उद्योग, वाणिज्य तथा आपूर्तिमन्त्री दामोदर भण्डारीले जनअपेक्षा पूरा गर्नका लागि नयाँ गठबन्धन निर्माण भएको बताउनुभएको छ । 

मन्त्री भण्डारीले सोमबार नेपाल कम्युनिष्ट पार्टी (एमाले) बैतडीको नवौँ जिल्ला अधिवेशन उद्घाटन गर्दै  जनताको निराशालाई आशामा बदल्न नयाँ गठबन्धनको आवश्यकता महशुस गरिएको बताउनुभयो ।  ‘राष्ट्रिय चुनौतीलाई एकतामा बदल्न एमाले सफल भएको छ’ उहाँले भन्नुभयो– ‘जनअपेक्षा पूरा गर्न हामी सरकारमा गएका हौँ । जनताको शिर झुक्ने गरी काम गरिने छैन । बैतडी र सिङ्गो सुदूरपश्चिमलाई केन्द्रमा राखेर काम गरिनेछ ।’

मन्त्री भण्डारीले  देश निर्माणका लागि अहिलेको गठबन्धन बनेको उल्लेख गर्दै चुनौतीलाई अवसरमा बदल्नुआवश्यक रहेको बताउनुभयो । ‘देश सङ्कटपूर्ण अवस्थामा छ’ उहाँले भन्नुभयो– ‘सरकारमा रहुञ्जेल यसलाई स्वर्णिम अवसरका रूपमा लिएका छौँ । जनताको पक्षमा काम गर्ने प्रतिबद्धता जनाउँछौँ ।’

मन्त्री भण्डारीले  राजनितिक शक्ति सुन्तुलनका आधारमा देशमा परिवर्तन  आएको भन्दै  पार्टी ‘मिसन-८४’ मा हिँडेकाले सबैले एकतावद्ध भएर लाग्नुपर्नेमा जोड दिनुभयो ।