भक्तपुर। महाशिवरात्रि पर्वका लागि केदारनाथको शिर मानिने डोलेश्वर महादेवको मन्दिरमा नेपाल र भारतका विभिन्न ठाउँबाट आएका साधुसन्त एवं नागाबाबालाई दक्षिणासहित बिदाइ गरिएको छ । 
 
केदारनाथको शिर डोलेश्वर महादेव संरक्षण तथ विकास समितिले साधुसन्तलाई ‘क’ र ‘ख’ वर्गमा विभाजन गरी दक्षिणा दिएर आज बिदाइ गरेको समितिका महासचिव हरिशरण बस्नेतले जानकारी दिनुभएको छ । 

समितिले ‘क वर्गका १३० जना साधुसन्त एवं बाबाहरुलाई दक्षिणस्वरुप जनही  एक हजार २ सय ५ रुपैयाँ र ‘ख’ वर्गका साधुसन्त एवं बाबाहरुलाई ८ सय ५ का साथै एक(एक थान धोती र कम्बल पनि दिइएको जनाएको छ । 

महाशिवरात्रिका लागि एक साता अगाडिदेखि डोलेश्वर मन्दिर आएका साधुसन्त र बाबाहरुलाई मन्दिर परिसरमै खाने, बस्ने र धुनी जगाउने व्यवस्था गरिएको थियो । महाशिवरात्रिका दिन  मन्दिरमा ६० हजार दर्शनार्थीले दर्शन गरेको जानकारी दिँदै उहाँले मन्दिरमा जम्मा भएको भेटी भने केही दिनमा सार्वजनिक गरिने बताउनुभयो ।