काठमाडौँ  । राष्ट्रियसभा अध्यक्षको निर्वाचन सार्ने नेपाली कांग्रेसको प्रस्ताव अस्वीकृत भएको छ । 

राष्ट्रियसभा अध्यक्षको निर्वाचन फागुन २९ गते गर्ने तयारी भइरहेको छ ।  राष्ट्रियसभामा प्रतिनिधित्व गर्ने  विभिन्न दलको  आइतबार बिहान भएको सर्वदलीय बैठकमा कांग्रेसले  राष्ट्रियसभा अध्यक्षको निर्वाचन सार्न प्रस्ताव गरेको हो । बैठकमा कांग्रेसको संसदीय दलका नेता कृष्णप्रसाद सिटौलाले  राष्ट्रियसभा अध्यक्षको निर्वाचन केही दिन पर सार्न प्रस्ताव गर्नुभएको थियो । तर अन्य दलले कांग्रेसको प्रस्तावलाई अस्वीकार गरेका छन् । 

कांग्रेसको प्रस्ताव अस्वीकृत भएपछि राष्ट्रियसभा अध्यक्षको निर्वाचन निर्धारित समयअनुसार फागुन २९ गते नै हुने भएको छ । संसद सचिवालयका अनुसार ‘पूर्वनिर्धारित समयमै चुनाव गर्ने निर्णयसहित कार्यसूची तय भएको छ ।’ राष्ट्रियसभा बैठक आज  दिउँसो १ बजेर ९ मिनेटमा बोलाइएको छ । आजको बैठकले राष्ट्रियसभा अध्यक्ष निर्वाचनको मिति औपचारिक रुपमा तोक्ने छ ।