काठमाडौँ । सुशील कोइराला मेमोरियल फाउण्डेशनले विपी कोइरालाको जीवनीमा आधारित ‘राजद्रोही राजनेता’ नामक वृत्तचित्र काठमाडौँमा प्रस्तुत गरेको छ ।  

पञ्चायती व्यवस्थाको विरोध गरेवापत तत्कालीन शासकको रवैयका कारण भारत निर्वासनमा रहन बाध्य हुनुभएका नेपाली कांग्रेसका नेता एवं पूर्वप्रधानमन्त्री विपी कोइराला स्वदेश फर्केपछिको घटनाक्रमलाई वृत्तचित्रमा समेटिएको छ । विशेष गरी २०३३ सालको राजनीतिक घटनाक्रमलाई समेटेर तयार गरिएको वृत्तचित्रमा कोइराला परिवारका सदस्य, आफन्तजन, शुभचिन्तक एवं राजनीतिक विश्लेषकको भनाइलाई स्थान दिइएको छ ।   

राजकाजसम्बन्धी ८ मुद्दा खेम्दै ज्यान जोखिममा राखेर स्वदेश फकर्नुभएका नेता कोइरालामा आधारित वृत्तचित्र ४५ मिनेटको छ । फाउन्डेशनका महासचिव अतुल कोइरालले वृत्तचित्र हेरेपछि नेपालको तत्कालीन राजनीतिक  घटनाक्रमसहितको इतिहास बुझ्न सहयोग पुग्ने विश्वास व्यक्त गर्नुभयो ।  ६ वर्ष लगाएर तयार गरिएको वृत्तचित्र निर्माणमा करिब ४५ लाख रुपैयाँ खर्च भएको जानकारी दिँदै महासचिव कोइरालाले वृत्तचित्र अब क्रमशः विद्यालय तथा कलेजमा प्रदर्शन गरिने जानकारी दिनुभएको छ । 

वृत्तचित्र यसअघि कीर्तिपुर र पोखरामा प्रदर्शन भइसकेको छ । वृत्तचित्रका लेखक उपप्राध्यापक एवं पत्रकार जगत नेपाल हुनुहुन्छ । संयोजन फाउण्डेशनले गरेको महासचिव कोइरालाले जानकारी दिनुभयो ।