काठमाडौँ ।  कोटेश्वर–तीनकुने क्षेत्रको बागमती  किनारमा वृक्षरोपण गरिएको छ ।
 
म्यान्मारबाट आउनुभएकी समाजसेवी तुलसी थापाबाट प्राप्त १५ वटा तेजपातको बिरुवा बागमती  सफाइ महाअभियानको पाँच सय ८३औँ साताको अवसरमा आज बागमती किनारमा रोपिएको अभियानकर्मी किशोरसिंह शाहीले जानकारी दिनुभएको छ । बागमती  सफाइका अभियानकर्मीहरुले  पिपल, ओखर, सुन्तला, एभोकाडो र तेजपात गरी ५० भन्दाबढी पाँच फिट अग्ला वृक्षरोपण गरिएको हो ।
   
वर्षामा आउने बाढीले बागमती मा जम्मा भएका फोहर बगाएर लैजाने गरेकाले वर्षायाम लागेपछि नदी क्षेत्र सफा देखिने गरेको छ । सफाइमा काठमाडौँ महानगरपालिका वडा नम्बर ११ का अध्यक्ष हिरालाल तन्डुकार, नदी संरक्षण समितिका अध्यक्ष मेघ आले, वरिष्ठ कृषि विशेषज्ञ छवि पौडेल लगायत अभियानकर्मीको सहभागिता थियो । नदी किनारमा भेटिएका नकुहिने फोहर काठमाडौँ महानगरपालिका, वातावरण विभागको गाडीले व्यवस्थापन गरेको थियो ।
 
विसं २०७० जेठ ५ गतेदेखि शुरु बागमती  सफाइ अभियान अझै जारी छ । बागमती सफाइ महाअभियानबाट प्रभावित भई सहायक नदीमा पनि सफाइ अभियान शुरु गरिएको छ । चक्रपथका उत्तर पश्चिमी भेगमा सफाइ अभियान चलिरहेको छ । काठमाडौँ उपत्यका बाहिरका प्रमुख नदीमा सफाइ शुरु भएको छ । 

हाल देशभर एक सय आठभन्दा बढी स्थानमा सफाइ भइरहेको महाअभियानले जनाएको छ । अर्को साता बागमती  सफाइ कोटेश्वर महादेव मन्दिरभन्दा तल बागमती  पहेँलो पुल अर्थात् गणेश मन्दिर चोक क्षेत्रमा गरिने जानकारी दिइएको छ ।