दाङ ।  तुलसीपुर–४ निवासी जितबहादुर थापा अवकाशप्राप्त सशस्त्र प्रहरी सहायक निरीक्षक हुनुहुन्छ । 

उहाँ २०७७ सालमा अवकाशपछि तुलसीपुर–४ बायोखोलामा बङ्गुर, बाख्रा र कुखुरापालन गरिरहनुभएको छ ।  उहाँले २५ वटा बङ्गुर, ४० वटा जति बाख्रा र १ हजार  ५ सय बढी ब्रोइलर कुखुरापालन गर्नुभएको छ । करिब १० लाख  रुपैयाँ लागतमा उहाँले व्यवसाय शुरु गर्नुभएको हो । 

स्थानीयस्तरमै स्वरोजगार बन्नुपर्ने भन्दै आफूले  काम प्रारम्भ गरेको  बताउनुभयो । ‘धेरै मान्छे स्वदेशमा श्रम नगरेर विदेश जाने गर्छन्, तर यहाँ नै परिश्रम गरे प्रशस्त आम्दानी गर्न सकिन्छ’ थापाले भन्नुभयो । उहाँले वार्षिक १५–२० लाख रुपैयाँ आम्दानी गर्दै आएको बताउनुभयो ।

२० वर्ष सशस्त्र प्रहरी बल नेपालमा  सेवा गर्नुभएका थापासामाजिक सेवामा पनि उत्तिकै सक्रिय हुनुहुन्छ । मूलपानी सामुदायिक वन उपभोक्ता समूहका अध्यक्ष समेत रहनुभएका उहाँ भन्नुहुन्छ– ‘मैले समाजको सेवा गर्ने प्रण गरेको छु, जागिरमा हुँदा शान्ति सुरक्षामा खटिए । अब समाजलाई सकेको सहयोग गर्छु ।’