काठमाडौँ । अविरल वर्षाका कारण आएको बाढीपहिरोमा जीवन गुमाउनको संख्या ८३ पुगेको छ । 

मनुसुन शुरु भएपछि बाढीपहिरो लगायतका विपद्का घटनामा परेर देशभर हालसम्म ८३ जनाको मृत्यु भएको प्रहरी प्रधान कार्यालयले जनाएको छ । 

प्रहरीका  अनुसार  गएको जेठ २८ गतेदेखि आज बिहानसम्म देशका विभिन्न स्थानमा आएको बाढीपहिरामा परेर ३३ पुरुष, २५ महिला र २५ बालबालिकाको मृत्यु भएको छ ।
      
केन्द्रीय प्रहरी प्रवक्ता एवं प्रहरी नायव महानिरीक्षक दानबहादुर कार्कीका अनुसार गएको जेठ २८ देखि आज बिहानसम्म बाढीपहिरामा परेर १ सय ६ जना घाइते भएका छन् । हालसम्म दुई पुरुष र ३ महिलासहित ५ जना बेपत्ता भएको उहाँले जानकारी दिनुभयो । घाइते हुनेमा ५१ पुरुष, ३६ महिला र १९ बालबालिका छन् । 

यस अवधिमा बाढीपहिरोका कारण तीन सय ८४ पशु चौपायाको क्षति भएको छ । एक सय ३९ घर र ५४ गोठमा क्षति पुगेको प्रहरी प्रवक्ता कार्कीले बताउनुभयो । वर्षा र पहिरोका कारण ८ सय ५८ परिवार विस्थापित भएका छन् । बाढीपहिरोमा परेकाको उद्धारका लागि हालसम्म  ५ हजार ४  सय २८ प्रहरी परिचालन गरिएको छ ।

मुलुकको विभिन्न भागमा परेको अविरल वर्षाका कारण एक विद्यालय र दुई सरकारी भवनमा क्षति पुगेको छ भने ४१ पुल बगाएको छ ।  एक सय ६१ घर डुबानमा परेका र  १ सय १६ रोपनी जग्गा पुरिएको प्रहरी प्रधान कार्यालयले जनाएको छ ।

देशभर २ हजार ९  सय ५४ परिवार विस्थापित भएका छन् ।  घटनामा  १० करोड ७० लाख ४० हजार रुपैयाँ बराबरको क्षति पुगेको प्रहरीले जनाएको छ ।