लेखनाथ सिकारु
पाँचथर ।  पाँचथरको कुम्मायक गाउँपालिकाका प्रमुख प्रशासकीय अधिकृत गणेश अधिकारीले आमाको काजकिरियामा रहँदा समेत कार्यालयको काम संचालन गर्नुभएको छ । 

अधिकारीले आर्थिक वर्षको अन्तिम समयमा सेवाग्राहीलाई समस्या नपरोस भन्ने उदेश्यले  आमाको काजकिरियामा रहँदा समेत पालिकाको काम गर्नुभएको हो । 

अधिकारीकी आमा  मेनकादेवीको निधन भएको आज ७ दिन भएको छ । ‘आर्थिक वर्षको अन्तिम अवस्था छ, काम सकेर भुक्तानी पाउनुपर्ने अवस्थामा सेवाग्राहीलाई दुख नहोस भन्ने उदेश्यले किरिया पुत्री अवस्थामै समेत प्रशासकीय काम गरिरहेको छु’ उहाँले भन्नुभयो । 

उहाँले आइतबारकाजक्रिया बसिरहेका बेलामा पनि सम्बन्धित कर्मचारीलाई सबै फायल लिएर आउन भन्नुभएको थियो ।  त्यसपछि प्रक्रियामा रहेका कामकाजको भुक्तानी सदर गर्नुभएको हो ।   भुक्तानी प्रक्रियामा प्रमुख प्रशासकीय अधिकृत र लेखा प्रमुखको दस्तखत अनिवार्य रहने गरेको छ । 

‘मैले सम्बन्धित कर्मचारी साथीहरुलाई प्रक्रियामा रहेका सबै फायल लिएर आउन भनेको थिएँ,  प्रक्रियामा पुगेका कामकाजको भुक्तानी सदर गरेको छु’ उहाँले भन्नुभयो ।  काजकिरिया र सुत्केरी समयमा कानुनले बिदा दिएकै भएपनि आफ्नो दायित्व र समुदाय र सेवाग्राहीप्रतिको उत्तरदायित्वलाई ख्याल राखेर काम गर्नुपरेको उहाँको भनाई छ ।