सिरहा । लहान नगरपालिकाले सामुदायिक विद्यालयको शैक्षिक स्तर सुधार गर्न प्रविधिमैत्री सामग्री वितरणमा जोड दिएको छ । 

यसैगरी जनशक्ति व्यवस्थापन र अपुग शिक्षक दरबन्दी कायम गर्ने तथा विद्यायलयको भौतिक संरचना निर्माण र स्तरोन्नत्तिमा ध्यान दिन आग्रह गरिएको छ । 

नगरपालिकाले विद्यालयको शिक्षण सिकाइलाई व्यवहारिक र प्रविधिमैत्री बनाउनका लागि १ विद्यालय १ कम्प्युटर प्रयोगशाला, १ कक्षा १ शिक्षक र प्रति कक्षा पङ्खाको अवधारणा लागू गर्न आर्थिक वर्ष २०७९/८० मा  ६ करोड रुपैयाँ र चालू आर्थिक वर्ष २०८०/८१ मा ८ करोड रुपैयाँ विनियोजन गरेको लहान नगरपालिकाका प्रमुख महेशप्रसाद चौधरीले जानकारी दिनुभयो ।

नगरप्रमुख चौधरीका अनुसार यस वर्ष ३  सय ३० बेन्च र ३६ कम्प्युटर तथा प्रिन्टर वितरण गरिएको छ । विद्यालयको शैक्षिक सुधारलाई प्राथमिकतामा राखिएको उहाँको भनाइ छ । ‘प्रविधिमैत्री बनाउन र साधनस्रोत कम भएका विद्यालयलाई आवश्यकताका आधारमा नगरले सहयोग गर्दैआएको छ’ उहाँले भन्नुभयो । 

एक विद्यालय एक शिक्षक कार्यक्रमअन्तर्गत १ सय २५ स्वयम सेवक शिक्षक भर्ना गरिएको छ । नगरका ५९ सामुदायिक विद्यायलको शैक्षिक गुणस्तर सुधार गर्न प्रयत्नशील रहेको नगरप्रमुख चौधरीले बताउनुभयो । 

शहीद रमेश महतो आधारभूत विद्यालयका प्रधानाध्यापक उपेन्द्र महतोले नगरपालकाको नियमित अनुगमनबाट शैक्षिक सुधार गर्न हौसला मिलेको बताउनुभयो ।