कैलाली । नेपाल विद्युत् प्राधिकरणले सुदूरपश्चिममा लामो समयदेखि विद्युत् महशुल नबुझाउने ग्राहकको विद्युत् लाइन विच्छेद गर्न थालेको छ । 

प्राधिकरणले चालु आर्थिक वर्षमा महशुल बुझाउन अटेर गर्ने ग्राहकको विद्युत् लाइन विच्छेद गर्न थालेको हो । प्राधिकरणले चालु आवको वैशाख मसान्तसम्ममा सुदूरपश्चिमका  ९ वटै जिल्लाका ३ हजार ७  सयभन्दा १२ जना ग्राहकको लाइन विच्छेद गरेको जनाएको छ । 

सुदूरपश्चिमका  ९ वटै जिल्लाका महशुल नबुझाउने ग्राहकका कारण करोडौँ रकम बक्यौता रहेपछि प्राधिकरणले लाइन विच्छेद गर्न थालेको नेपाल विद्युत् प्रादेशिक कार्यालय अत्तरियाका निर्देशक जङ्गबहादुर चन्दले बताउनुभयो ।

उहाँका अनुसार चालु आवको  त्यस अवधिमा ६ करोड ३५ लाख रुपैयाँ बक्यौता रकममध्ये लाइन विच्छेद गरेर ४ करोड ५० लाख  रुपैयाँ महशुल असुल गरिएको छ । लामो समयदेखि महशुल तिर्न अटेरी गर्दै आएका ग्राहकलाई  महशुल तिर्न पटकपटक ताकेता गर्दा पनि तिर्न आनाकानी गरेपछि बाध्य भएर लाइन विच्छेद गर्नुपरेको निर्देशक चन्दले बताउनुभयो ।

सुदूरपश्चिमका नौ जिल्लाका ग्राहकबाट ६ करोड ३४ लाख ९४ हजार रुपैयाँ महशुल बक्यौता देखिएपछि लाइन विच्छेद गरिएको प्राधिकरणले जनाएको छ । नेपाल विद्युत् प्राधिकरणले लाइन काटेका  ३ हजार ७  सय १२ ग्राहकमध्ये २ हजार ५ सय ६२ जनाले बक्यौता तिरेर लाइन जडान गरेका छन् भने लाइन विच्छेद गरिएका १ हजार १ सय ५० ग्राहकले अझै लाइन जडान नगरेको निर्देशक चन्दले जानकारी दिनुभयो ।

सुदूरपश्चिमका ९ जिल्लामा १२ वितरण केन्द्रबाट विद्युत् सेवा प्रदान गर्दै आएको प्राधिकरणले जनाएको छ । प्राधिकरणका अनुसार सुदूरपश्चिममा हालसम्म ३ लाख ६७ हजार २ सय ७० ग्राहक छन् । 

सुदूरपश्चिमका पहाडी जिल्लामा विद्युत् सेवा विस्तार हुन नसकेका स्थानमा ठेक्का सम्झौता भएर विद्युतीकरण विस्तारको काम भइरहेकाले हरेक वर्ष प्राधिकरणका ग्राहकको सङ्ख्या पनि बढ्दै गएको निर्देशक चन्दले बताउनुभयो ।