अछाम  । कर्णाली नदीको झोलुङ्गे पुलको जाली लत्रिँदा बीच भागमै अड्किएका ११ खच्चडको जीवितै उद्धार गरिएको छ । दुई वटा खच्चड भने मरेका छन्  । 

अछामको पञ्चदेवल बिनायक नगरपालिका–९ कालेकाडा र दैलेखको आठबिस नगरपालिका–६ खिड्कीजिउला जोडने झोलुङ्गे पुलको जाली लत्रिएपछि आज बिहानदेखि १३ खच्चड पुलको बीच भागमा अड्किएका थिए । खच्चडलाई पुलको जाली काटेर कर्णालीमा खसाली उद्धार गरिएको अछामका प्रहरी नायव उपरीक्षक सन्तोष पाठकले जानकारी जानकारी दिनुभएको छ । ‘पुलको जाली काटेर उद्धार गर्ने क्रममा २ वटा खच्चड मरेका हुन्’ उहाँले भन्नुभयो– ‘बाँकीको डुङ्गाको सहायताले जीवितै उद्धार गर्न सफल भयौँ ।’ 

पुलको दाँहिने तर्फको जाली लत्रिएको थियो । खट्टा जालीभित्र पसेपछि खच्चड पुलमा अड्किएका हुन् । पुलको दाँहिने तर्फको भाग पुरै बाङ्गो भएको छ ।  खच्चडको उद्धारमा नेपाली सेनाको अछामस्थित गोरख बक्स गणको टोली, सशस्त्र प्रहरी बल, नेपाल प्रहरी र स्थानीयवासी खटिएका थिए ।