काभ्रे । नमोबुद्ध नगरपालिकामा कोठा तताउन फलामको कराइमा आगो बालेर सुत्दा पूर्व वडाअध्यक्षको  मृत्यु भएको छ ।

कोठा तताउन कराइमा आगो बालेर निदाउँदा नगरपालिकाको वडा नम्बर १ का पूर्व अध्यक्ष ८२ वर्षीय कर्मा ग्याल्बो लामाको मृत्यु भएको हो । कर्मा ग्याल्बोसँगै सुतेकी पत्नी ८१ पर्षीया असनी लामालाई भने बेहोस अवस्थामा अस्पताल भर्ना गरी उपचार भइरहेको काभ्रे प्रहरीले जानकारी दिएको छ ।

प्रहरीका अनुसार राति खाना खाएपछि कोठा न्यानो पार्न हिटर र फलामको कराइमा आगो बालेर उनीहरु सुतेका थिए । बिहान अबेरसम्म पनि नउठेपछि छोरा बुहारीले ढोका खोलेर हेर्दा दुवै जना बेहोस अवस्थामा भेटिए । तत्काल धुलिखेल अस्पताल पुर्‍याइएकामा कर्मालाई केहीबेरमा अस्पतालले मृत  घोषणा गरेको हो । 

कर्मा ग्याल्बो पत्नीको भने उपचार भइरहेको र अवस्था मध्यम रहेको  काभ्रेका डीएसपी तथा प्रवक्ता राजकुमार श्रेष्ठले जानकारी दिनुभएको छ ।