चितवन ।  चेपाङ आवास कार्यक्रमअन्तर्गत इच्छाकामना गाउँपालिकामा २२ घर निर्माण भएका छन् । 

सङ्घीय सरकारको एक करोड ५० लाख रुपैयाँ अनुदानबाट विपन्न ती घर निर्माण गरिएका हुन् । पालिकाका सात वडामा आर्थिक अवस्था कमजोर भएका चेपाङ समुदाय छनोट गरेर घर निर्माण गरिएको इच्छाकामना गाउँपालिकाका अध्यक्ष दानबहादुर गुरुङले जानकारी दिनुभयोे । अब एक महिनाभित्रमा सम्बन्धित व्यक्तिलाई  हस्तान्तरण गरिनेछ । 

‘घडेरी सम्याउने र जग खनेर ढुङ्गा हाल्ने काम सम्बन्धित लाभग्राहीको हो’ अध्यक्ष गुरुङले भन्नुभयो– ‘अरु सबै गाउँपालिकाले निर्माण गरिदिएको छ ।’ उहाँले गाउँपालिकाले खरको छाना भएका र आर्थिक अवस्था कमजोर भएका चेपाङ परिवारलाई टिनको छानाको व्यवस्था गरेको जानकारी दिनुभएको छ ।  पालिकाको वडा नम्बर १ मा पाँच, वडा नम्बर २ मा दुई, वडा नम्बर ३ मा दुई, वडा नम्बर ४ मा दुई, वडा नम्बर ५ मा दुई, वडा नम्बर ६ मा तीन र वडा नम्बर ७ मा ६ वटा घर निर्माण गरिएको छ । 

इच्छाकामना गाउँपालिका–१ कोलभन्ज्याङका अरसल चेपाङ भूकम्पले पुरानो घर भत्किएपछि छाप्रामा बस्दै आएको बताउनुभयो । उहाँले बर्खामा पानी चुहिने र हिउँदमा हुरीबतास र आगलागीको डर अब अन्त्य भएको बताउनुभयो । ‘गाउँपालिकाले घर बनाइदिएपछि निकै खुशी छौँ, ६ जनाको परिवार एउटै कोठामा बस्नुपर्ने बाध्यता अन्त्य हुने भएको छ’ उहाँले भन्नुभयो । इच्छाकामना गाउँपालिकामा २ हजार ५ सय चेपाङ परिवारको बसोबास छ ।